قورعانىس ءمينيسترى تاراز گارنيزونىنداعى اسكەري بولىمدەردى تەكسەردى
بۇل تۋرالى قازاقپارات ق م سىلتەمە جاساپ حابارلايدى.
كوميسسيا قۇرامىندا قورعانىس ءمينيسترىنىڭ ورىنباسارلارى گەنەرال- لەيتەنانت رۋسلان شپەكبايەۆ، گەنەرال-مايور مۇحامەدجان تالاسوۆ، قۇرلىق اسكەرلەرىنىڭ باس قولباسشىسى گەنەرال-مايور تالعات قويباقوۆ، سونداي-اق ينجەنەرلىك اسكەرلەر، رادياتسيالىق، حيميالىق، بيولوگيالىق قورعاۋ جانە ەكولوگيالىق قاۋىپسىزدىك دەپارتامەنتتەرىنىڭ، اسكەري ينفراقۇرىلىم باس باسقارماسىنىڭ وكىلدەرى بار. گەنەرال-لەيتەنانت رۋسلان جاقسىلىقوۆ تاراز گارنيزونىنىڭ ينفراقۇرىلىم نىساندارىمەن تانىسىپ، اسكەري ءبولىم كومانديرلەرىنىڭ بولىمشەلەردىڭ ماقساتتارى مەن مىندەتتەرى، ولاردىڭ جاساقتالۋى، جاراقتاندىرىلۋى، جاۋىنگەرلىك مۇمكىندىكتەرى، ينفراقۇرىلىمى مەن دامۋ كوكجيەگى، اعىمداعى جاي-كۇيى جانە پروبلەمالىق ماسەلەلەرى تۋرالى باياندامالارىن تىڭدادى.
بايزاق اۋدانىنداعى اسكەري بولىمدە مينيسترگە تەحنيكالىق اۋماقتى جارىلىس قاۋپى بار وق-دارىلەردىڭ قالدىقتارىنان تازارتۋ تۋرالى باياندالدى. وقيعا سالدارلارىن جويۋ بويىنشا بىرىككەن جاساقتىڭ كۇشىمەن قاينار رازەزىنىڭ، اسكەري قالاشىقتىڭ، ۇزىندىعى بەس شاقىرىم تەمىرجول جانە اۆتوموبيل جولدارى، سونداي-اق اسكەري ءبولىمنىڭ ىرگەلەس اۋماقتارى تازارتىلدى.
ينجەنەرلىك وق-دارىلەر بازاسىنىڭ اۋماعى تۇگەلدەي تازارتىلدى. جارىلىس قاۋپى بار زاتتار مەن مەتال سىنىقتارىنىڭ بولشەكتەرى ارنايى جابدىقتالعان الاڭدار مەن جيناۋ پۋنكتىنە جەتكىزىلدى. اشىق ساقتالاتىن جەتى الاڭ تازارتىلىپ، وق-ءدارى قالدىقتارى جارىلىس الاڭىنا اكەتىلدى.
كوميسسيا وسى ايدا قايتا باستالاتىن تازالاۋ جۇمىستارىن جالعاستىرۋ دايىندىعىن تەكسەردى.
وتكەن جىلدىڭ تامىز ايىندا بولعان جارىلىستا حابار- وشارسىز كەتكەن كىشى سەرجانت باۋىرجان داۋىتبايەۆتى ىزدەستىرۋ جۇمىستارىن جالعاستىرۋعا ەرەكشە نازار اۋدارىلدى.
بۇل جۇمىستى «وڭتۇستىك» وڭىرلىك قولباسشىلىعىنىڭ بولىمشەلەرى مەن ۇلتتىق ۇلاننىڭ جەكە قۇرامىن جۇمىلدىرا وتىرىپ جۇرگىزۋ جوسپارلانۋدا.
قورعانىس ۆەدومستۆوسىنىڭ باسشىسى قارۋ- جاراق پەن اسكەري تەحنيكانى جوندەۋ پروتسەسىمەن تانىستى، سونداي-اق ۇشقىشسىز باسقارىلاتىن اپپاراتتاردىڭ ماماندارىن دايارلاۋ ورتالىعىندا بولدى.
قورعانىس ءمينيسترى قازاقستان پرەزيدەنتى - قارۋلى كۇشتەردىڭ جوعارعى باس قولباسشىسى قويعان مىندەتتەر اياسىندا بولىمشەلەردىڭ جاۋىنگەرلىك ازىرلىگى مەن جاۋىنگەرلىك دايارلىعىن قاجەتتى دەڭگەيدە ۇستاۋ، سونداي-اق اۋماقتى قاۋىپسىزدىك تالاپتارىن قاتاڭ ساقتاي وتىرىپ تازارتۋ جۇمىستارىن جالعاستىرۋ جونىندەگى مىندەتتەردى بەلگىلەدى.