اۋىل شارۋاشىلىعىنا سيفرلىق تەحنولوگيالار ەنگىزىلەدى
سەناتتىڭ سالالىق كوميتەتىنىڭ ءتوراعاسى ءالي بەكتايەۆ ورتالىققا كەلۋدىڭ ماقساتى - وسى تاقىرىپ بويىنشا وتەتىن دوڭگەلەك ۇستەل وتىرىسىنا دايىندىق ماقساتىندا اۋىل شارۋاشىلىعىنا سيفرلىق تەحنولوگيالاردى ەنگىزۋ، عارىشتان مونيتورينگ جاساۋ مەن قاشىقتان زوندتاۋ تەتىكتەرىن زەردەلەۋ ەكەنىن اتاپ ءوتتى.
«اۋىل شارۋاشىلىعىنىڭ ونىمدىلىگى مەن ەڭبەك ونىمدىلىگىن ارتتىرۋ جانە جالپى اۋىل شارۋاشىلىعىن دامىتۋ - سيفرلاندىرۋعا تىكەلەي بايلانىستى. اۋىلشارۋاشىلىعى جەرلەرى مەن مالعا سەنىمدى بازا جاساپ، قامتاماسىز ەتپەيىنشە ءبىزدىڭ جۇمىسىمىز العا باسپايدى»، - دەدى ءالي بەكتايەۆ.
سەناتورلار اۋىل شارۋاشىلىعى مينيسترلىگى مەن س. سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ باسشىلىعىمەن، ساراپشىلار قاۋىمداستىعى وكىلدەرىمەن جانە عالىمدارمەن بىرلەسە وتىرىپ سالالىق مىندەتتەردى شەشۋ جانە اۋىل شارۋاشىلىعى جەرلەرىن ۇتىمدى پايدالانۋ ءۇشىن مونيتورينگ جاساۋ، عارىش مونيتورينگىن ىسكە اسىرۋعا قاتىستى ماسەلەلەردى تالقىلادى.
پارلامەنتشىلەر سونداي-اق «قازاقستان عارىش ساپارى» ۇلتتىق كومپانياسى جۇمىسىنىڭ ناتيجەلەرى جانە اۋىل شارۋاشىلىعى ماقساتىنداعى رەسۋرستاردى ۇتىمدى پايدالانۋ ءۇشىن عارىشتان مونيتورينگ جاساۋ جونىندەگى بولاشاق جوسپار تۋرالى دا ايتتى.
وتىرىس بارىسىندا عارىش قىزمەتى سالاسىنداعى زاڭناماعا عارىشتان مەملەكەتتىك مونيتورينگ جاساۋ، اقپاراتتىق جۇيە، اتاپ ايتقاندا اۋىل شارۋاشىلىعى بويىنشا ءبىرىڭعاي وپەراتور قۇرۋ جونىندە وزگەرىس ەنگىزۋ تۋرالى ايتىلدى. سەناتور ءالي بەكتايەۆ بارلىق سالالىق مەكەمەلەرگە جۇكتەلگەن مىندەتتەردى تولىق كولەمدە ورىنداۋ قاجەتتىگىن ايتا كەلىپ، سوندا عانا وڭ ناتيجەگە قول جەتكىزۋگە بولاتىنىن اتاپ ءوتتى.
«پروبلەمالىق ماسەلەلەر كوپ. بەلگىلى ءبىر قاراجات كەرەك بولادى، ءتىپتى زاڭناماعا جانە نورماتيۆتىك- قۇقىقتىق اكتىلەرگە وزگەرىستەر ەنگىزىلۋى مۇمكىن. شىنىندا دا مۇنىڭ بارلىعى الداعى ۋاقىتتا سالالىق مەملەكەتتىك ورگاندارمەن جۇمىس ىستەۋ بارىسىندا انىقتالادى، سودان كەيىن ۇسىنىستار مەن وزگەرىستەر ەنگىزۋ كەرەك»، - دەپ اتاپ ءوتتى ول.
سەناتورلار وتىرىستى قورىتىندىلاي كەلىپ ونىڭ بارىسىندا ايتىلعان بارلىق ۇسىنىستاردى سەنات كوميتەتىنىڭ دەپۋتاتتارى مۇقيات زەردەلەيتىنىن جانە كەيىننەن مۇددەلى مەملەكەتتىك ورگاندارعا جىبەرىلەتىن ۇسىنىمدار ازىرلەنەتىنىن اتاپ ءوتتى.