ون ءتورت قاسقىر قورىقتى اپاتتان قۇتقاردى
عالىمدار سول جىلى ۆايومينگ، مونتانا جانە ايداحو شتاتتارىندا ورنالاسقان يەللوۋستوۋن ۇلتتىق ساياباعىنا ون ءتورت قاسقىر جىبەرگەن ەدى. اراعا ۋاقىت سالىپ، ايماقتىڭ ەكوجۇيەسى تۇبەگەيلى وزگەرىسكە ۇشىرايدى.
«قالاي؟» دەيسىز عوي. جاۋابى تاڭعالارلىق. يەللوۋستوۋن جانۋارلارى 70 جىلدان استام قاسقىرسىز وزدەرىمەن وزدەرى ءومىر ءسۇرىپ كەلگەن. جىرتقىشتىڭ بولماۋى سەبەبىنەن مۇندا جىلدار بويى مارالدار بيلىك قۇرعان. ولاردىڭ كوبەيگەنى سونشالىق، اينالاداعى ءشوپتىڭ ءبىرشاما ازايۋىنا اسەر ەتكەن. مارالدار سانىنىڭ ءوسۋىن، ءتىپتى، ادام بالاسى دا توقتاتا الماعان. البەتتە، ساياباققا جىبەرىلگەن ون ءتورت قاسقىر بارلىق مارالدى جەپ تاۋىسپاعانى انىق. ءبىراق جىرتقىشتار پايدا بولعالى ولار قورىقتىڭ كەيبىر ايماقتارىنا بارۋدى دوعارعان ءارى ءجۇرىپ- تۇرۋى رەتكە كەلگەن. تيىسىنشە، مارال بارماعان جەردە ءشوپتىڭ ءوسۋى دە ءوز قالپىنا كەلگەن.
التى جىلدىڭ ىشىندە ورمانداعى اعاشتىڭ سانى بەس ەسەگە وسكەن. ونىڭ اسەرىنەن اعاش قابىعىن كەمىرىپ، توعاندار جاساۋدى سۇيەتىن قۇندىزدار كوبەيگەن. توعاندار پايدا بولعان سوڭ، سۋ قويناۋلارى بالىققا، ارتىنشا ونداتر مەن ۇيرەككە تولعان. سۋ بار جەردە - تىرشىلىك بار. اينالاعا سونداي- اق قويان مەن تيىندەر دە قاپتاي باستاعان. ولاردىڭ كوپتىگى قورىققا تۇلكى مەن كۇزەننىڭ، جىرتقىش قۇستاردىڭ كەلۋىنە اسەر ەتكەن. ال، جيدەكتىڭ كوبەيۋىنە وراي، ايۋلاردىڭ دا سانى ارتقان. ەڭ قىزىعى، قاسقىرلار، ءتىپتى، وزەن اعىسىنىڭ رەتتەلۋىنە دە سەپتىكتەرىن تيگىزگەن. اعاش پەن ءشوپتىڭ كوپتەپ ءوسۋى وزەن جاعاسىن نىعايتقان. ناتيجەسىندە سۋ ارناسى تۇزەلىپ، جاعانىڭ وپىرىلۋى ازايعان. وسىلايشا نەبارى ون ءتورت قاسقىر قورىقتىڭ ەكوجۇيەسىنىڭ وزگەرۋىنە اسەر ەتىپ، يەللوۋستوۋندى ۇلكەن تابيعي اپاتتان امان الىپ قالعان.
Massaget.kz