ورداباسى اۋدانىندا 100 جاستان اسقان اق جاۋلىقتى انالار كوپ. ماسەلەن، تىل ەڭبەككەرى شامبەك راحمانوۆا 106 جاسقا تولىپ وتىرسا، حلاۋدا كەنەلدى قىزى، كەنجە وتكەلبايەۆانى، سونداي-اق كەڭەس وداعىنىڭ باتىرى قارسىباي سىپاتايەۆتىڭ قىزى ناعيما جۇندىبايەۆا دا عاسىر كۋاگەرى اتانىپ وتىر.
ورداباسى اۋدانىندا 8-ناۋرىز - حالىقارالىق ايەلدەر كۇنىنە ارنالعان مەرەكەلىك ءىس-شارالار عاسىر جاساعان اق جاۋلىقتى انالاردى قۇتتىقتاۋمەن باستالدى. اۋدان اكىمى باعلان باتىرشايەۆ عاسىر كۋاگەرلەرىنىڭ ۇيلەرىنە ارنايى بارىپ، يىقتارىنا ورامال جاۋىپ، مەرەكەلىك گۇل شوقتارىن سىيلادى.
1916 -جىلى 1-قاڭتاردا دۇنيەگە كەلگەن شامبەك اجە بۇگىندە تەمىرلان اۋىلىندا كەنجە قىزى التىننىڭ قولىندا تۇرادى.
15 شاقتى ۇل-قىز تاربيەلەپ وسىرگەن التىن قۇرساق انا نەمەرە، شوبەرە، شوپشەك، نەمەنەسىن قوسقاندا 150 دەن استام ۇرپاقتىڭ قازىنالى اقىلشىسىنا اينالعان. ال، ۇيالجار اۋىلىندا تۇراتىن حلاۋدا اجە ناعىز ەڭبەكتىڭ ادامى بولعان. ەل باسىنا كۇن تۋعان قيىن كەزەڭدە ەر ازاماتتارمەن قاتار كەتپەن شاۋىپ، شيەتتەي بالا- شاعاسىن ەڭبەكپەن اسىراعان.
«ءبىر عاسىر ىشىندە ۇلت تاريحىنداعى قانشاما وقيعالارعا كۋا بولعان اجەلەرىمىزدىڭ ونەگەلى ءومىرى - بارشامىزعا ۇلگى. الداعى ۋاقىتتا ءبىز ءجۇز جاساعان قارتتارىمىزدىڭ ءومىر جولى، جەتكەن جەتىستىكتەرى تۋرالى دەرەكتەر جيناپ، اۋدان ارحيۆىن جاسايتىن بولامىز. سول ارقىلى وسكەلەڭ ۇرپاقتى وتكەن تاريحىمىزبەن جان- جاقتى تانىستىرماقپىز»، دەدى اۋدان اكىمى ءوز سوزىندە. بادامداعى كەنجە وتكەلبايەۆاعا مەرەكەلىك سالەمىن الا بارعان اۋدان باسشىسى مەديتسينالىق جانە الەۋمەتتىك كومەك كورسەتىلەتىندىگىن جەتكىزدى. سونىمەن قاتار، اۋدان باسشىسى داڭقتى باتىر قارسىباي سىپاتايەۆتىڭ بادام اۋىلىندا تۇراتىن قىزى ناعيما جۇندىبايەۆانى كەلە جاتقان مەرەيلى مەيراممەن قۇتتىقتاپ، سىي-سياپات كورسەتتى.