كولىك جۇرگىزۋشىلەرى اقىلى جول قۇنىن تولەمەۋ ءۇشىن قانداي ايلاعا بارادى

نۇر- سۇلتان. قازاقپارات - «قازاۆتوجول» ۇلتتىق كومپانياسى اقىلى جولدار ديرەكسياسىنىڭ ەكسپلۋاتاتسيا جۇيەسى ءبولىمىنىڭ باسشىسى ماديار ايتبايەۆ كەيبىر جۇرگىزۋشىلەر اقىلى جول قۇنىن تولەمەي ءوتۋ ءۇشىن قانداي ارەكەتتەرگە باراتىنىن ايتىپ بەردى، دەپ حابارلايدى قازاقپارات ءتىلشىسى.

«1403 Call -ورتالىعىنىڭ قىزمەتكەرلەرى 24/7 رەجيمىندە جۇمىس ىستەيدى. ءبىزدىڭ ماماندار جولعا قاتىستى بارلىق وڭىردەن كەلىپ تۇسكەن ساۋالدارعا تاۋلىك بويى جاۋاپ بەرەدى. سونىمەن قاتار ورتالىق قىزمەتكەرلەرى اقىلى جولدارداعى كولىك قوزعالىسىن ونلاين باقىلاپ وتىرادى. ماقسات - جولاۋشىلاردىڭ قاۋىپسىزدىگىن قامتاماسىز ەتۋ جانە زاڭبۇزۋشىلىققا جول بەرمەۋ. اقىلى جولداردا ءتارتىپتى بۇزاتىن جۇرگىزۋشىلەر دە بار. مىسالى، اقىلى جول بەكەتىنەن وتكەن كەزدە اۆتوموبيلدىڭ ءنومىرىن جاسىرادى. وسىلايشا كولىك يەسى تەگىن جۇرگىسى كەلەدى. ياعني ءنومىردى جاسىرعان جاعدايدا فوتو جانە بەينەباقىلاۋ كامەراسى كولىكتى تولىق انىقتاي المايدى»، - دەدى ماديار ايتبايەۆ اتالعان كومپانيا ۇيىمداستىرعان ب ا ق وكىلدەرىنە ارنالعان باسپا ءسوز تۋرىندا.

ونىڭ ايتۋىنشا، جول اقىسىن تولەۋ بەكەتىنە جەتكەندە كولىك ءنومىرىن شەشىپ الاتىن جۇرگىزۋشىلەر دە بار.

«ارينە، ءبىزدىڭ ماماندار زاڭ بۇزۋشىلىققا جول بەرمەيدى. ءتارتىپبۇزۋشىلىق بولعان جاعدايدا كولىك يەسىن انىقتاپ، جول اقىسىن تولەۋ كەرەكتىگىن ەسكەرتەدى. اقىلى جول قۇنىن تولەمەي جۇرگىسى كەلەتىن جۇرگىزۋشىلەر بارشىلىق»، - دەيدى ول.

سونداي- اق، «قازاۆتوجول» ۇلتتىق كومپانياسى ۇسىنعان دەرەككە سۇيەنسەك، «1403» call-ورتالىعىنىڭ قىزمەتكەرلەرى 3 جىلدىڭ ىشىندە ازاماتتاردان كەلىپ تۇسكەن 230 مىڭعا جۋىق ءوتىنىشتى قاراستىرعان.

اۆتور: ءالي يبرايەۆ