قوسشىدا دەمالىس بازاسى ورتەنىپ جاتىر

نۇر- سۇلتان. قازاقپارات - اقمولا وبلىسىنا قاراستى قوسشى قالاسىنداعى دەمالىس بازالارىنىڭ بىرەۋى ورتەنىپ جاتىر، دەپ حابارلايدى قازاقپارات ءتىلشىسى.

وقيعا ورنىندا بىرنەشە ءورت ءسوندىرۋ تەحنيكاسى مەن توتەنشە جاعدايلار دەپارتامەنتىنىڭ ماماندارى جۇمىس ىستەپ جاتىر. دەمالىس بازاسىنىڭ قىزمەتكەرلەرى قازاقپارات تىلشىسىنە ءورت شىققان كەزدە عيماراتتا ادام بولماعانىن ايتتى.

اقمولا وبلىسى توتەنشە جاعدايلار دەپارتامەنتى باسپا ءسوز قىزمەتىنىڭ وكىلى دينارا ەسەنبايەۆانىڭ ايتۋىنشا، ءورتتى سوندىرۋگە نۇر- سۇلتان قالاسىنان قۇتقارۋشىلار شاقىرىلعان.

«2- ناۋرىز كۇنى ساعات 13.23-تە قوسشى قالاسىنىڭ ايتەكە بي كوشەسىندەگى 33 «ا» مەكەنجايى بويىنشا ورنالاسقان «چيستىە پرۋدى» دەمالىس ايماعىنىڭ اۋماعىندا عيماراتتىڭ شاتىرىنان ءورت شىققان. ءورتتىڭ الىن الا سەبەپتەرى مەن شارپىعان اۋدان انىقتالىپ جاتىر. قۇربان بولعاندار مەن زارداپ شەككەندەر جوق. وقيعا ورنىنا اقمولا وبلىسى توتەنشە جاعدايلار دەپارتامەنتىنىڭ 1 تەحنيكاسى مەن 4 قىزمەتكەرى، نۇر- سۇلتان قالاسى توتەنشە جاعدايلار دەپارتامەنتىنىڭ 2 تەحنيكاسى مەن 7 قىزمەتكەرى باردى. ءورت ءالى سوندىرىلگەن جوق»، - دەلىنگەن اقمولا وبلىسى توتەنشا جاعدايلار دەپارتامەنتىنىڭ باسپا ءسوز قىزمەتى بەرگەن مالىمەتتە.

اۆتور: ەسىمجان ناقتىباي