پرەزيدەنت اسكەردىڭ ايبىنىن ارتتىرۋدى تاپسىردى
قازاقپارات بۇل تۋرالى اقورداعا سىلتەمە جاساپ حابارلايدى.
قاسىم- جومارت توقايەۆ قورعانىس ۆەدومستۆوسىنىڭ باسشىلىعىنا اسكەري قاۋىپسىزدىكتىڭ قازىرگى جاعدايىن ەسكەرە وتىرىپ، قارۋلى كۇشتەردىڭ قۇرىلىمى مەن قۇرامىن جاڭعىرتۋ جونىندە تاپسىرما بەردى. سونىمەن قاتار زاماناۋي سيفرلىق تاسىلدەر ارقىلى اسكەري باسقارۋ جۇيەسىن جەتىلدىرۋ قاجەت ەكەنىنە نازار اۋداردى.
جيىندا قازاقستان اسكەرىن زاماناۋي ءارى جوعارى تەحنولوگيالى قارۋ تۇرلەرىمەن، اسكەري تەحنيكامەن قايتا جابدىقتاۋ ماسەلەلەرى تالقىلاندى. قورعانىس مينيسترلىگىنە اسكەري كۇشتەردى پايدالانۋدىڭ جاڭا ادىستەرىن ەنگىزۋ ارقىلى جاۋىنگەرلىك دايىندىق باعدارلاماسىن قايتا قاراۋ تاپسىرىلدى.
مەملەكەت باسشىسى اسكەري قىزمەتشىلەردىڭ كاسىبي دەڭگەيىن ارتتىرۋ، مەريتوكراتيا قاعيداتى نەگىزىندە مانساپتى ءوسىرۋ ماقساتىمەن اسكەري ءبىلىم بەرۋ جانە كادرلىق ساياسات جۇيەسىن دامىتۋ ماسەلەلەرىنە باسا ءمان بەردى.
پرەزيدەنت اسكەري قىزمەتشىلەر مەن اسكەري قىزمەتتىڭ الەۋمەتتىك مارتەبەسىن ارتتىرۋ جانە جاستاردى اسكەري بورىشىن وتەۋگە ىنتالاندىرۋ قاجەتتىگى تۋرالى ايتتى. جيىن سوڭىندا جوعارعى باس قولباسشى مەملەكەتتىڭ مۇددەسىن جانە ءاربىر ازاماتتىڭ قاۋىپسىزدىگىن قورعاۋ قارۋلى كۇشتەردىڭ مىندەتى ەكەنىن اتاپ ءوتتى.