مينيستر ۋكرايناداعى جاعدايدىڭ قازاقستانداعى ينفلياتسياعا قالاي اسەر ەتەتىنىن ايتتى
«قازىر بىزدە ينفلياتسيا ءدالىزى 5-7 پايىزدىڭ شاماسىندا بولسا، تاعى 1-2 پايىزعا كوتەرىلەتىن شىعار. ءبىز ايتىپ وتىرعان نەگاتيۆتى سەناري بويىنشا ودان دا ۇلكەن بولۋى مۇمكىن. قازىر ناقتى بىردەڭە ايتۋعا ەرتە. ويتكەنى جاعداي نە كۇرت ناشارلاۋى مۇمكىن، نە كۇرت جاقسارۋى مۇمكىن. بۇل قازىر ەكى ەل اراسىندا ءوتىپ جاتقان كەلىسسوزدەرگە بايلانىستى. ۋكراينا- رەسەي اينالاسىنداعى جاعداي قانشالىق ۇزاققا سوزىلسا، ەكونوميكاعا اسەرى دە سونشالىق كۇشتى بولادى. ياعني، پروبلەما نەعۇرلىم تەز شەشىلسە، وڭىردەگى ەلدەر دە سوعۇرلىم از زارداپ شەككەلى تۇر»، - دەگەن مينيستر وڭىردەگى گەوساياسي احۋال جىلجىمايتىن مۇلىك باعاسىنا دا اسەر ەتۋى مۇمكىن ەكەنىن ءمالىم ەتتى.
«تەڭگە السىرەگەن كەزدە جىلجىمايتىن مۇلىك نارىعىندا كەيبىر قۇرىلىس ماتەريالدارىنىڭ باعاسىنا قىسىم تۇسەدى. قۋانىشقا وراي، قازىر ماتەريالداردىڭ كوبىن وزىمىزدە وندىرەمىز. ءتىپتى كەيبىر كورسەتكىشتەر بويىنشا 80 نەمەسە 100 پايىز الماستىرۋعا قول جەتكىزدىك. كەراميكا، شىنى سياقتى بۇرىن مۇلدە قازاقستاندا وندىرىلمەگەن تاۋارلار بويىنشا 1-2 زاۋىت سالۋ ارقىلى-اق يمپورتتى 100 پايىز الماستىرۋعا قول جەتكىزىپ جاتىرمىز»، - دەدى الىبەك قۋانتىروۆ.
«قازىر ينفلياتسياعا قىسىم بولىپ جاتىر. ونىڭ اسەرى قانداي بولاتىنىن ناقتى ايتۋ قيىن. كىشكەنە شىداي تۇرۋ كەرەك. سەبەبى ۋكريناداعى جاعداي بارىنشا تەز تۇراقتانسا، بىزدەگى باعاعا اسەرى تومەن بولادى. ءبىراق ونى ءالى قاداعالاۋ كەرەك. ۇكىمەت ۇلتتىق بانكپەن بىرگە داعدارىسقا قارسى ءتيىستى كەشەندى جوسپار قابىلدادى. سول جوسپار شۇعىل تۇردە ورىندالىپ جاتىر. نەگاتيۆتى، بازالىق جانە وپتيميستىك دەيتىن ءۇش سەناريى بار. ارينە، قازىر جاعداي كۇردەلى. ءبىراق بۇعان دەيىن ايتقانىمداي، ناقتى اسەردى باعالاۋ ءۇشىن كىشكەنە ۋاقىت كەرەك»، - دەدى مينيستر.
ونىڭ ايتۋىنشا، ۋكرايناداعى جاعداي ۋشىققان جاعدايدا دا بارلىق الەۋمەتتىك مىندەتتەمەلەر ىسكە اسىرىلادى. «سەبەبى ۇكىمەتتە وعان قاجەت قاراجات تا، مۇمكىندىك تە بار»، - دەدى ۆەدومستۆو باسشىسى.