ەرالى توعجانوۆ مەديتسينالىق وڭالتۋعا بولىنگەن قاراجاتتى قايتا قاراۋدى تاپسىردى
ق ر پرەمەر-ءمينيسترىنىڭ ورىنباسارى ەرالى توعجانوۆ دەنساۋلىق ساقتاۋ مينيسترلىگىنە وسى قاراجاتتى قايتا قاراۋدى تاپسىردى، دەپ حابارلايدى قازاقپارات ءتىلشىسى.
«مەديتسينالىق وڭالتۋدى دامىتۋ باعىتىندا ايتارلىقتاي وزگەرىستەر بار. سالانى قارجىلىق قامتاماسىز ەتۋ كولەمى ۇلعايدى. ماعان بەرىلگەن دەرەكتەر بويىنشا، مەديتسينالىق وڭالتۋعا 2022-جىلى 66 ميلليارد تەڭگە قاراستىرىلعان. بۇل 2019-جىلمەن سالىستىرعاندا 11 ەسە كوپ. ءبىراق وسى جەردە مەندە باسقا سۇراق تۋىنداپ وتىر. بۇل ۇلكەن ەسەپپەن العاندا وتە جاقسى كورسەتكىش، تەك كورسەتىلەتىن قىزمەت سانىن قاراۋ كەرەك. اقشاسى بويىنشا 11 ەسە ءوسىم بار، ال قىزمەت سانى سونشالىق كوپ ەمەس»، - دەدى ۆيتسە-پرەمەر.
ۇكىمەت باسشىسىنىڭ ورىنباسارى اتالمىش قاراجاتتى تيىمدىلىگى تۇرعىسىنان قايتا قاراۋ كەرەك دەپ ەسەپتەيدى.
«ەگەر اقشاسى 11 ەسە كوتەرىلسە، وڭالتۋ قىزمەتىن الاتىن ازاماتتار سانى دا 11 ەسە بولماسا دا، 3-5 ەسە وسەتىندەي مۇمكىندىك بار عوي. ياعني، ءبىراز سۇراقتار بار. سوندىقتان قايتادان قاراۋ كەرەك»، - دەدى ەرالى توعجانوۆ.