ۋكرايناداعى گۋمانيتارلىق جاعدايدى ەۋرووداق ىشكى ىستەر مينيسترلەرى تالقىلادى

بريۋسسەل. قازاقپارات - جەكسەنبى كۇنى ە و ادىلەت جانە ىشكى ىستەر كەڭەسىنىڭ كەزەكتەن تىس وتىرىسى ءوتىپ، وندا ۋكرايناداعى جاعدايدىڭ گۋمانيتارلىق سالدارى تالقىلاندى، دەپ حابارلايدى قازاقپارات ءتىلشىسى.

ادىلەت جانە ىشكى ىستەر كەڭەسى ەۋروپالىق وداققا مۇشە 27 ەلدىڭ ىشكى ىستەر مينيسترلەرىنەن تۇرادى.

«جاعدايدى باقىلاۋ، ىنتىماقتاستىق شارالارىن ۇيلەستىرۋ جانە بارلىعىن تارتۋ ماقساتىندا ە و- نىڭ ساياسي داعدارىسقا كەشەندى جاۋاپ بەرۋ تەتىكتەرىن جانداندىرۋ تۋرالى شەشىم قابىلداندى. ءبىرىنشى تەحنيكالىق جينالىس دۇيسەنبى، 28-اقپاندا شاقىرىلادى»، - دەلىنگەن ەۋروپالىق كوميسسيانىڭ حابارلاماسىندا.

كەزدەسۋگە قاتىسقان مينيسترلەر كەلەسى اسپەكتىلەرگە نازار اۋداردى: ۋكرايناعا گۋمانيتارلىق قولداۋ كورسەتۋ، ە و- نىڭ سىرتقى شەكارالارىن باسقارۋ، بوسقىنداردى قابىلداۋ، ۆيزالاردى بەرۋ بويىنشا بىرلەسكەن شارالار. ۋكرايناداعى جاعداي ەۋروپالىق وداقتان پانا ىزدەگەن ادامداردىڭ كوبەيۋىنە اكەلدى. بوسقىنداردى قابىلداۋ ۋكراينامەن شەكارالاس بىرنەشە وداققا مۇشە مەملەكەتتەردە ۇسىنىلدى. ە و مينيسترلەرى ەو ۇيلەستىرۋىمەن وسى ماسەلەدە كومەك سۇرايتىن مۇشە مەملەكەتتەرگە قولداۋ كورسەتۋگە دايىن ەكەندىكتەرىن ءبىلدىردى.

«ءبىز ولاردى ميگرانت دەپ اتاي المايمىز، ولار سوعىستان قاشقان بوسقىندار. بۇل تراگەديانىڭ گۋمانيتارلىق اسپەكتىلەرى ءبىزدى قاتتى الاڭداتادى جانە ءبىز ولاردى قابىلدايتىن ەلدەردى قولداۋ ءۇشىن تەز ارەكەت ەتۋىمىز كەرەك. ەو- نىڭ ازاماتتىق قورعاۋ مەحانيزمىن ىسكە قوستىق جانە 18 مۇشە مەملەكەت ۋكرايناعا ماڭىزدى گۋمانيتارلىق جابدىقتاردى جىبەرەدى. ۋكراينادان كەتەتىن ادامداردىڭ سانى ارتىپ كەلەدى»، - دەدى ەۋروپالىق ديپلوماتيا باسشىسى.