ۋكراينادان ەۆاكۋاتسيالانعان قازاقستاندىق شەكاراداعى جاعداي تۋرالى ايتتى

نۇر-سۇلتان. قازاقپارات - ۋكراينادان ەۆاكۋاتسيالانعان قازاقستاندىقتاردىڭ ءبىرى ەلەنا پەتروۆا. وتانداسىمىز شەكارادا قالىپتاسقان جاعداي تۋرالى ايتىپ بەردى، دەپ حابارلايدى قازاقپارات ءتىلشىسى.

«شەكارادا كەپتەلىستە تۇرمىز. جەرگىلىكتى ۆولونتەرلەر ىستىق تاماقپەن قامتىپ وتىر. وتە جاقسى كومەكتەسىپ جاتىر. ءار 100 مەتر سايىن جەدەل جاردەم تۇر، شۇعىل كومەككە دايىن. اۆتوبۋستىڭ ءىشى جىلى. كەپتەلىستە 10 مىڭداعان كولىك تۇر، ءبارىنىڭ دە كەتكىسى كەلەدى. قانشاما ادام شەكاراعا جاياۋ بارا جاتىر. ولاردىڭ اراسىندا قارتتار مەن بالالار بار. سالىستىرمالى تۇردە ءبىزدىڭ جاعدايىمىز جاقسى»، - دەدى ەلەنا پەتروۆا.

ونىڭ ايتۋىنشا، ۆولونتەرلەردەن بولەك، قاراپايىم تۇرعىندار دا كومەكتەسىپ جاتىر.

«قاراپايىم حالىق ءبىر-بىرىنە كومەكتەسىپ جاتىر. بىرەۋ تاماعىن بەرسە، ەكىنشىسى جىلى كيىممەن قامتاماسىز ەتۋدە. جاياۋ بارا جاتقان ادامدار بىزگە الىپ كەتىڭدەرشى دەپ ءوتىنىپ جاتىر. وعان بىزدە اۆتوبۋستا بوس ورىن جوق»، - دەيدى ول.