باتىس ەلدەرى رەسەيلىك بانكتەردى الەمدىك بانك جۇيەسىنەن اجىراتۋعا كەلىستى
مۇنداي شەشىمدى ۇلى بريتانيا، گەرمانيا، يتاليا، كانادا، ا ق ش، فرانسيا، سونداي-اق ەۋروكوميسسيا قابىلدادى، دەپ حابارلايدى قازاقپارات تاسس اگەنتتىگىنە سىلتەمە جاساپ.
ۇلى بريتانيا، گەرمانيا، يتاليا، كانادا، ا ق ش، فرانسيا جانە ەۋروكوميسسيا رەسەيگە قارسى جاڭا قاتاڭ قارجىلىق سانكسيالار ەنگىزۋگە، سونىڭ ىشىندە كەيبىر بانكتەردى اقپارات بەرۋ جانە تولەمدەردى جۇزەگە اسىرۋ ءۇشىن SWIFT بانكارالىق جۇيەسىنەن اجىراتۋعا كەلىستى. بۇل تۋرالى سەنبى كۇنى جۋرناليستەرگە گەرمانيا ۇكىمەتىنىڭ رەسمي وكىلى شتەففەن حەبەسترەيت مالىمدەدى. «حالىقارالىق قاۋىمداستىق سانكسيا سالعان بارلىق رەسەيلىك بانكتەر، قاجەت بولعان جاعدايدا باسقا رەسەيلىك بانكتەر SWIFT جۇيەسىنەن اجىراتىلادى»، - دەدى ول.
سونىمەن قاتار، س. حەبەشترەيتتىڭ ايتۋىنشا، باتىستىق سەرىكتەستەر رەسەي ورتالىق بانكىنىڭ حالىقارالىق قارجىلىق وپەراتسيالار ارقىلى رۋبل باعامىن قولداۋ مۇمكىندىگىن ودان ءارى شەكتەۋ تۋرالى شەشىم قابىلدادى.
«كەلىسىلگەن سانكسيالار سونىمەن قاتار رەسەيدەگى جانە ۋكرايناداعى سوعىستى قولدايتىن باسقا ەلدەردەگى جەكە تۇلعالار مەن ۇيىمدارعا دا باعىتتالعان. اتاپ ايتقاندا، بۇل رەسەيلىك اۋقاتتىلاردىڭ وزدەرىنە جانە جاقىندارىنا الاتىن «التىن ءتولقۇجاتقا» جانە ەۋروپا ازاماتتىعىن الۋ مۇمكىندىگىن شەكتەيدى»، - دەدى س. حەبەشترەيت.
«سونىمەن قاتار، سانكسيالاردىڭ جىلدام ورىندالۋىن قامتاماسىز ەتۋ جانە سانكسيالارعا ۇشىراعان جەكە تۇلعالاردىڭ، ولاردىڭ وتباسىلارى مەن فيرمالارىنىڭ اكتيۆتەرىنە تىيىم سالۋ ءۇشىن ا ق ش پەن ە و وكىلدەرىنىڭ قاتىسۋىمەن جۇمىس توبى قۇرىلادى»، - دەدى ول.
اۆتور: سماعۇلوۆا ەركەجان