ماڭعىستاۋلىق تىگىنشىنىڭ ۇلتتىق ناقىشتاعى كيىمدەرى شەتەلدە دە سۇرانىسقا يە
بۇعان بەينەۋ اۋىلىنىڭ تۇرعىنى جانار مەڭدىقۇلوۆانىڭ ءوز تسەحىن اشىپ، اۋدان، وبلىس كولەمىندەگى تاپسىرىستاردى ويداعىداي ورىنداپ جۇرگەنىن مىسال ەتۋگە بولادى، دەپ حابارلايدى قازاقپارات.
بۇل كاسىپكە دەگەن قىزىعۋشىلىق جانار مەڭدىقۇلوۆانىڭ ماماندىعىن دەنە شىنىقتىرۋ مۇعالىمىنەن تىگىنشىگە اۋىستىرۋعا يتەرمەلەدى. ايەل تىگىنشىلىك ونىڭ سۇيىكتى ءىسى ەكەنىن، ال ادام ءوزىنىڭ سۇيىكتى ىسىمەن اينالىسقاندا عانا جەتىستىككە جەتەتىنىن ايتىپ وتىر.
«شاعىن شەبەرحانامىزدا ماڭعىستاۋدا ءجيى كەزدەسەتىن ۇلتتىق كيىم ۇلگىلەرىن شىعارىپ، تىگەمىز. ەرلەر دە، ايەلدەر دە كيەتىن تۇيە جۇنىمەن قاپتالعان باس كيىمدەر نەمەسە پلاشتار ەرەكشە سۇرانىسقا يە. ەلىمىزدە تىگىلگەن قازاقتىڭ ۇلتتىق كيىمدەرى شەتەلگە شىعادى. ءتىپتى، مۇحيتتىڭ ارعى جاعى - نيۋ-يوركتەن ارنايى تاپسىرىستار بار. ءبىز ءۇشىن بۇل - ۇلكەن جەتىستىك. ۇلتتىق مادەنيەتىمىزدىڭ دۇنيە جۇزىنە تارالۋىنا اتسالىسىپ جۇرگەنىمە قۋانىشتىمىن»، - دەيدى جاننار مەڭدىقۇلوۆا.
اۆتور: زارينا تۋعانبايەۆا