رەسەي اسكەريلەرى كيەۆتى بومبالاۋدى جيىلەتتى
كەشە شاھار بيلىگى اۋە شابۋىلى قاۋپىن جاريالادى. سوڭعى مالىمەت بويىنشا بۇگىن كيەۆتىڭ شەتىنە زىمىران ءتۇسىپ، 16 قاباتتى ءۇي ورتەنىپ، 8 ادام جارالانعان. تاعى 150 تۇرعىن ەۆاكۋاتسيالاندى. ۋكراينا بيلىگى قالا شەتىندە رەسەيدىڭ ءبىر ۇشاعى اتىپ تۇسىرىلگەنىن ايتادى. ءبىراق رەسەي بۇل اقپاراتتى جوققا شىعارىپ وتىر.
ال ۇرىس الاڭىنداعى اقپارات ءارتۇرلى. ەكى تاراپتا دا ادام ءولىمى بار. بۇل كيەۆتەگى قازىرگى جاعداي. رەسەي كۇشتەرى ۋكرايناعا باسىپ كىرگەلى كيەۆتە اۋە دابىلى شابۋىلى ءجيى قوسىلىپ، تۇرعىندار ارنايى ورىندار مەن مەترولاردى پانالاۋعا ءماجبۇر. سەبەبى رەسەي اسكەرى شاھاردى قاناتتى جانە بالليستيكالىق زىمىراندارمەن اتقىلاۋعا كوشكەن. سولاردىڭ ءبىرى تۇرعىن ۇيگە تۇسكەن، جاراقات العاندار بار.
يۋري جىحانوۆ، تۇرعىن:
- تاڭعى 4-تەر شاماسىندا انامنىڭ تۇر دەپ ايعايلاعان داۋىسىنان وياندىم. قاراسام اينالانىڭ ءبارى ءتۇتىن، دابىل قاعىلىپ جاتىر. زاتتارىمىزدى الىپ دەرەۋ دالاعا شىقتىق. وزدەرىڭىز كورىپ تۇرعانداي بۇل اسكەري نىسان ەمەس. تۇرعىن ءۇي.
ال سوڭعى مالىمەتكە قاراعاندا رەسەي كۇشتەرى كيەۆكە جاقىنداپ قالعان. ولاردى وتكىزبەس ءۇشىن ۋكراين ساربازدارى قالاعا جاقىن كوپىردى جارىپ جىبەرگەن. ا ق ش قورعانىس ءمينيسترى للويد وستين ەلگە بەلارۋس جاقتان كىرگەن رەسەي جاساقتارى كيەۆتەن 32 شاقىرىمداي جەردە تۇرعانىن ايتادى. سۋمسك وبلىسى اكىمشىلىگىنىڭ باسشىسى دا رەسەيلىك اسكەريلەر ايماقتىڭ بارلىق ءىرى قالالارىن قورشاپ، كيەۆكە قاراي بارا جاتىر دەيدى.
دميتري جيۆيتسكي، سۋمسك وبلىسى اكىمشىلىگىنىڭ باسشىسى:
- قازىر سۋمسك وبلىسىنداعى جاعداي اۋىر. ءبىزدىڭ 27 زەڭبىرەكشىلەر بريگاداسى جاۋمەن كەسكىلەسكەن شايقاس جۇرگىزىپ جاتىر. احتىكاركا قالاسى ماڭىندا 2 رەت تويتارىس بەرىلدى. وكىنىشكە وراي سۋمسك وبلىسىنداعى مەكەندەردىڭ ءبارى قورشالعان.
سۋمى قالاسىنان اسكەري تەحنيكا كيەۆكە قاراي بەت الىپ جاتىر. باتىسقا قاراي وتە كوپ تەحنيكا ءوتتى. كەسكىلەسكەن ۇرىس ۋكراينانىڭ ءار ايماعىندا ءجۇرىپ جاتىر. ەلدىڭ باس شتابىنىڭ مالىمدەۋىنشە، ۋكراينا كۇشتەرى رەسەيدىڭ 7 ۇشاعى مەن 6 تىكۇشاعىن 30-دان استام تانكىسىن تالقانداپ، 800-دەي ساربازىنىڭ كوزىن جويعان. ءبىراق قارا تەڭىزدەگى زمەيينىي ارالى ءۇشىن شايقاستا 137 جاۋىنگەرىنەن ايىرىلىپ، اۋدان رەسەي جاساقتارىنىڭ باقىلاۋىنا وتكەن. چەرنوبىل ايماعى دا رەسەي اسكەرىنىڭ قولىنا كوشتى.
دەنيس شمىگال، ۋكراينا پرەمەر- ءمينيسترى:
- وكىنىشكە قاراي، چەرنوبىل اۋماعى مەن اتوم ەلەكتر ستانسياسىنىڭ بارلىق نىساندارى رەسەي اسكەرىنىڭ باقىلاۋىنا الىندى.
ايماق باسشىلىعىنىڭ مالىمەتى بويىنشا، قۇرباندار مەن زارداپ شەككەندەر جوق. رەسەي قورعانىس مينيسترلىگى بولسا ادام شىعىنى تۋرالى اقپاراتتى راستاعان جوق. كەرىسىنشە ءوزىن ءوزى جاريالاعان دونەتسك جانە لۋگانسك حالىق رەسپۋبليكالارىنىڭ كۇشتەرى ۋكراينا اسكەرىنە سوققى بەرىپ جاتقانى ايتىلادى.
ۆەدومستۆو 150 ۋكراينا ساربازىنىڭ ءوز ەركىمەن بەرىلگەنىن حابارلادى.
يگور كوناشەنكوۆ، ر ف قورعانىس مينيسترلىگىنىڭ رەسمي وكىلى:
- ارنايى اسكەري وپەراتسيا جالعاسىپ جاتىر. وسى ساتكە دەيىن رەسەي قارۋلى كۇشتەرىنىڭ الدىنا قويىلعان بارلىق تاپسىرمالار ءساتتى ورىندالدى. ۋكراينانىڭ 83 اسكەري نىسانى ىستەن شىعارىلدى، 2 س ۋ 27، 2 س ۋ-24 ۇشاقتارى، ءبىر تىكۇشاق جانە 4 بايراقتار وزدىگىنەن ۇشۋ اپپاراتى جويىلدى.
ال باتىس اقپارات قۇرالدارى رەسەي كۇشتەرى كيەۆتى بىرنەشە كۇننىڭ ىشىندە باقىلاۋعا الادى دەگەن سىڭايداعى اقپاراتتاردى جاريالاي باستادى. ءبىراق ۋكراينالىقتار بەرىلۋگە نيەتتى ەمەس. جاقىندا قورعانىس مينيسترلىگى قالانى قورعايمىن دەۋشىلەرگە قارۋ بەرىلەتىنىن حابارلادى.
داۋرەن اقاش ۇلى
www.24.kz