مۇنايدىڭ قىمباتتاۋى قازاقستانداعى جانارماي باعاسىنا اسەر ەتە مە
«وزدەرىڭىز بىلەسىزدەر، قازىر بىزدە مۇناي باعاسى بەلگىلەنگەن، رەتتەلىپ وتىر. ىشكى نارىقتاعى مۇناي باعاسىنىڭ الەمدىك باعامەن ەشقانداي بايلانىسى جوق. ءتىپتى حالىقارالىق باعا وسسە دە، ىشتەگى باعاعا تىكەلەي اسەرى بولمايدى. ءبىز ىشتەگى باعا وسەدى دەپ كۇتىپ وتىرعان جوقپىز»، - دەدى ۆەدومستۆو باسشىسى.
ءمينيستردىڭ ايتۋىنشا، ەلدەگى مۇناي ونىمدەرى ءوز شيكىزاتىمىزدان ءارى ءوز زاۋىتتارىمىزدا وڭدەلەتىندىكتەن، سىرتقى نارىقتاعى باعاعا تاۋەلدى ەمەس.
«سىرتقى نارىقتا جىل باسىندا مۇنايدىڭ باعاسى 80 دوللاردان تومەن بولسا، قازىر 100 دەن اسىپ تۇر. ال ىشتەگى باعا وزگەرگەن جوق. تاريحي ولشەممەن قاراساق تا حالىقارالىق نارىقتاعى ەكسپورت باعاسى مەن مۇناي ونىمدەرىنىڭ ىشكى باعاسىنىڭ اراسىندا كورەللياتسيا جوق. ويتكەنى ءبىز جانارمايدى ءوز مۇنايىمىزدان، ءوز زاۋىتتارىمىزدا وندىرەمىز. ەگەر يمپورتتاعان بولساق، شىنىمەن دە وتە قاتتى تاۋەلدىلىك بولار ەدى. ءبىراق ءبىز ءوزىمىز وندىرەمىز. ياعني، بىزدە ىشكى باعانى ۇستاپ وتىرۋ مۇمكىندىگى بار»، - دەدى ەنەرگەتيكا ءمينيسترى.