اۋىزدان شىعاتىن جاعىمسىز ءيىس نەدەن پايدا بولادى؟
كەيدە ادام ءوزى دە سەزبەۋى مۇمكىن. سوندىقتان ول ءيىس نەدەن پايدا بولاتىنىن ءبىلىپ العان ءجون.
اۋىز قۋىسىنداعى جاعىمسىز ءيىس - اۋىزداعى، قىزىل يەك، ءتىس پەن تىلدەگى باكتەريالاردىڭ شىعاراتىن گازى. ارينە ودان ارىلۋدىڭ قاراپايىم جولى - ءتىستى ۋاقىتىلى جۋۋ. كەيدە مۇنىڭ ءوزى كومەكتەسپەۋى مۇمكىن.
جاعىمسىز ءيىس كوبىنە قىزىل يەك پەن ءتىس تازالىعىن تولىق ساقتاماعاننان پايدا بولادى. ول ءۇشىن ءتىستى كۇنىنە 2 رەت جۋىپ تۇرۋ كەرەك. سونداي-اق ءتىستى باساتىن قارا داقتارعا دا ءمان بەرىڭىز.
كەيدە ديابەت، بۇيرەك پەن اسقازان اۋىرعاندا دا اۋىزدان جاعىمسىز ءيىس شىعادى. سونداي- اق تىنىس الۋ جولدارى ينفەكسياسىنان دا پايدا بولۋى مۇمكىن.
اۋىز قۋىسىنىڭ جاعىمسىز يىسىنە كوبىنە تەمەكى شەگۋ، ىشىمدىك ءىشۋ جانە باسقا دا ونىمدەردى ءجيى تۇتىنۋ سەبەپ بولىپ جاتادى. الايدا جاعىمسىز ءيىس بارىنە ءمالىم پياز، سارىمساقتان عانا ەمەس، ءسۇت، ىرىمشىك، ەتتەن دە بولىپ تۇرادى. اۋىز قۋىسىندا قالعان تاعام قالدىقتارىنىڭ قۇرامىنداعى اقۋىز باكتەريالاردىڭ اسەرىنەن وزگەرىستەرگە ۇشىراپ، جاعىمسىز يىسكە سەبەپ بولادى. اۋىز قۋىسىن دۇرىس نەمەسە تولىققاندى تازالاماۋ ماسەلەنى ودان سايىن ورشىتەدى.
كەيدە جاعىمسىز ءيىس كەيبىر ءدارى- دارمەكتەردى قابىلداۋدىڭ ناتيجەسىندە پايدا بولادى. ايەلدەر ەتەككىر الدىندا جاعىمسىز ءيىستىڭ پايدا بولاتىنىن بايقاۋى مۇمكىن. بۇل گورموندار دەڭگەيىنىڭ قۇبىلمالى بولۋىنا بايلانىستى.
ادامدار كوبىنە ءتىسىن جۋىپ، ءتىلىن تازالاۋدى ۇمىتىپ كەتەدى. ال ءتىل بۇرتىكتەرىندە باكتەريا، ءولى جاسۋشالار مەن تاماق قالدىقتارى قالىپ قويادى. مۇنى تازالاماي اۋىزداعى جاعىمسىز يىستەن قۇتىلۋ ەكىتالاي.
ءار تاماق ىشكەن سايىن اۋىزدى شايىپ ءجۇرۋدى ادەتكە اينالدىرىڭىز. بۇل ءتىس اراسى مەن تىلدە تاعام قالدىقتارىنىڭ قالىپ كەتپەۋىنە كومەكتەسەدى.
جوعارىدا ايتا كەتكەندەي، ەڭ ءبىرىنشى جاعىمسىز ءيىس نەدەن پايدا بولعانىن انىقتاپ الۋ ماڭىزدى. ول ءۇشىن ءتىس دارىگەرىنە كورىنىڭىز.