قازاقستاندا ۋتيل الىم بويىنشا عىلىمي زەرتتەۋ جۇرگىزۋ ۇسىنىلدى
«ءبىز ۇكىمەت پەن مينيسترلىككە قايتا وڭدەۋشىلەردىڭ اعىمداعى شىعىندارىن نەگىزگە الا وتىرىپ، ۋتيل الىمدى قايتا ەسەپتەۋدى ۇسىندىق. سونىمەن قاتار ەكىنشى رەتتىك رەسۋرستارمەن نە ىستەيتىندىگىنە قاتىستى ماسەلە تۇر. ول دەگەنىمىز مىس، اليۋميني، بولات، قالدىق ماي، دوڭگەلەك، اككۋمۋلياتور جانە تاعىس باسقا. كوپ جاعدايدا ولاردى نارىققا ەكىنشى رەتتىك ماتەريالدىق رەسۋرستار تۇرىندە ساتىپ جاتادى. سوندىقتان ءبىز عىلىمي- زەرتتەۋ جۇمىستارىن جۇرگىزۋدى جانە قايتا وڭدەۋشىلەردىڭ رەسۋرستاردى ساتۋدان قانداي كىرىس الاتىندىعىن جانە ولار قانداي شىعىندار اكەلەتىنىن ناقتىلاۋىمىز قاجەت. بۇل تەڭگەرىمدى قايتا قاراپ، بيزنەس ءۇشىن 0-40 رەنتابەلدىلىكپەن جاعداي جاساعان ءجون»، - دەدى KazWaste قالدىقتاردى باسقارۋ قازاقستان اسسوتسياتسياسىنىڭ باسقارما ءتوراعاسى شىنبولات بايقۇلوۆ ەلوردادا ءوتىپ جاتقان ەكولوگيا تاقىرىبىنا ارنالعان كونفەرەنسيا بارىسىندا.
ونىڭ ايتۋىنشا، ۋتيل الىمدى رەسۋرستاردىڭ كادەگە جارامدىلىعىنا قاراي بەلگىلەگەن دۇرىس. «ءبىز قازىر عىلىمي- زەرتتەۋ جۇمىستارىن جۇرگىزۋ قاجەتتىلىگىن العا تارتىپ وتىرمىز. بۇل نارىقتا كىم جۇمىس ىستەيتىندىگىن، شىعىندار مەن قايتا وڭدەۋدىڭ ناقتى ۇلەسىن انىقتاۋ ءۇشىن قاجەت. جانە اتالعان شارانى «جاسىل دامۋ» مەملەكەتتىك وپەراتورى جاساۋى ءتيىس دەپ ەسەپتەيمىز. مىسالى، جەڭىل اۆتوموبيلدىڭ كەيبىر قالدىقتارىن قايتا وڭدەۋ مۇمكىن ەمەس. ول دەگەنىمىز پوليۋرەتاندى قاپتاما، پوليۆينيلحلوريد، ونىڭ ىشىنەن ءاۆتوموبيلدىڭ بەلگىلى ءبىر بولىكتەرى نەمەسە تۇيىندەرى تۇرادى. ولاردى الىپ تاستاۋ ەكونوميكالىق تۇرعىدان ءتيىمسىز. سوندىقتان ولاردى اينالىمعا قايتارۋ، ءقاۋىپسىز تۇردە الىپ تاستاۋ نەمەسە سۋبسيديالاۋ كەرەك»، - دەيدى ول. بۇعان دەيىن حابارلاعانىمىزداي ەلىمىزدە قاتتى تۇرمىستىق قالدىقتاردىڭ 22 پايىزى عانا قايتا وڭدەلەدى.