قازاقستاندىقتار مەملەكەتتىك قىزمەت ساپاسىنا قانشالىقتى كوڭىلى تولادى
وسى جانە وزگە دە مەملەكەتتىك قىزمەت ساپاسىنا قاتىستى ماسەلەلەرگە قر مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقبايەۆ توقتالىپ ءوتتى، دەپ حابارلايدى قازاقپارات ءتىلشىسى.
«اگەنتتىك جۇمىسىنىڭ ماڭىزدى باعىتتارىنىڭ ءبىرى حالىققا ساپالى مەملەكەتتىك قىزمەت كورسەتۋ. بۇل باعىتتا اۋقىمدى جۇمىس اتقارىلدى دەپ ايتۋعا بولادى. سەبەبى باقىلاۋ فۋنكتسيالارىن ىسكە اسىرۋ اياسىندا 2021 -جىلى رەسپۋبليكا بويىنشا بارلىعى 782 تەكسەرۋ جۇرگىزىلدى. ونىڭ ناتيجەسىندە مەملەكەتتىك قىزمەت كورسەتۋ سالاسىندا 24 مىڭنان استام قۇقىق بۇزۋشىلىق انىقتالدى. زاڭ بۇزۋشىلىقتىڭ باسىم بولىگى مەملەكەتتىك قىزمەت كورسەتۋدىڭ مەرزىمىنە بايلانىستى. تەكسەرىس قورىتىندىسىنا ساي 229 تۇلعا اكىمشىلىك جاۋاپكەرشىلىككە تارتىلدى»، - دەدى دارحان جازىقبايەۆ اگەنتتىگىنىڭ كەڭەيتىلگەن القا وتىرىسىندا.
ونىڭ ايتۋىنشا، 2021 -جىلى مەملەكەتتىك قىزمەت كورسەتۋ ساپاسىنا قاتىستى حالىقتان 716 ءوتىنىش كەلىپ ءتۇستى.
«تۇرعىنداردان كەلىپ تۇسكەن وتىنىشتەردىڭ نەگىزىندە 359 جوسپاردان تىس تەكسەرىس جۇرگىزىلدى. تەكسەرۋ بارىسىندا 160 ءوتىنىش يەسىنىڭ شاعىمى راستالدى. مەملەكەتتىك قىزمەت كورسەتۋ سالاسىندا قۇقىق بۇزۋشىلىقتىڭ الدىن الۋ ماقساتىندا ءبىزدىڭ اگەنتتىكتىڭ جانىندا دەپۋتاتتار، قۇزىرلى ورگان ماماندارى، ۇكىمەتتىك ەمەس ۇيىم وكىلدەرىنەن قۇرالعان كونسۋلتاتيۆتىك ساراپتامالىق توپ جۇمىس ىستەيدى. وتكەن جىلى اتالعان جۇمىس توبىنىڭ 3 وتىرىسى ءوتتى. وتىرىس ناتيجەسىندە مەملەكەتتىك قىزمەتتەردىڭ ساپاسىن ارتتىرۋ بويىنشا ۇسىنىستار ازىرلەندى»، - دەيدى ول.
سونداي-اق، اگەنتتىك ءتوراعاسى مەملەكەتتىك قىزمەتتى كورسەتۋدىڭ ساپاسىنا قاتىستى حالىق پىكىرى ەسكەرىلگەنىن ايتتى.
«وتكەن جىلى پرەزيدەنت اكىمشىلىگىنىڭ تاپسىرماسىنا سايكەس، ەلەكتروندى ۇكىمەت پورتالى ارقىلى مەملەكەتتىك قىزمەتتى كورسەتۋ ساپاسىنا قوعامدىق باقىلاۋ مونيتورينگى جۇرگىزىلدى. مونيتورينگ 95 مەملەكەتتىك قىزمەت بويىنشا 23 مىڭنان استام رەسپوندەنتتىڭ قاتىسۋىمەن ءوتتى. ناتيجەسىندە حالىقتىڭ مەملەكەتتىك قىزمەت كورسەتۋ ساپاسىنا قاناعاتتانۋ دەڭگەيى 75 پايىزدى قۇرادى. بۇل وبەكتيۆتى قامتاماسىز ەتۋگە مۇمكىندىك بەرەتىندىكتەن اگەنتتى شارانى بيىل دا جالعاستىرادى»، - دەيدى د. جازىقبايەۆ.