الما ادامنىڭ جاسىن جاسارتادى

نۇر-سۇلتان. قازاقپارات - سوڭعى جىلدارى ۇلىبريتانيانىڭ نورريچ قالاسىنداعى تاعام زەرتتەۋ ينستيتۋتىنىڭ عالىمدارى المانى تۇراقتى تۇردە جەپ ءجۇرۋ ادام اعزاسىن جاسارتىپ ءومىرىن ۇزارتاتىنى تۋرالى ءوز جاڭالىقتارىن جاريالادى.

الما جەمىسىنىڭ قۇرامىندا جۇرەك جۇمىسىن جاقسارتىپ، قان اينالىمىنىڭ قالىپتى بولۋىن جانە يممۋندىق جۇيەنىڭ قورعانىشتىق قابىلەتىن كۇشەيتەتىن ەرەكشە «ەپيكاتەحين پوليفەنول» دەگەن كۇردەلى قوسىلىستىڭ بولاتىنىن انىقتادى. الما جەمىسىنىڭ قۇرامىنداعى بۇل قوسىلىس ينفاركت نەمەسە ينسۋلت دەپ اتالاتىن جۇرەك اۋرۋلارىنا ەداۋىر توسقاۋىل جاسايدى ەكەن.