قازاقستاندىق تريونىڭ ونەرى بەرلين كورەرمەندەرىن ءتانتى ەتتى
بەتحوۆەننىڭ سكريپكا، ۆيولونچەل جانە وركەسترمەن فورتەپيانوعا ارنالعان اتاقتى كونسەرتىن وتاندىق ارتىستەر بەرلين سيمفونيالىق وركەسترىمەن بىرگە ورىندادى. الەمنىڭ ۇزدىك ونەر جۇلدىزدارى ءۇشىن ەۋروپانىڭ جاۋھارى اتانعان بەرلين سيمفونيالىق وركەسترىمەن ءبىر ساحنادا ونەر كورسەتۋ قازاقستاندىق ونەرپازدار ءۇشىن ۇلكەن مارتەبە.
2200 كورەرمەنگە ارنالعان ۇلكەن زال لىق تولى بولدى، كونسەرت بيلەتتەرى نەبارى ەكى-اق كۇندە ساتىلىپ كەتكەن. بەرلين فيلارمونياسىنىڭ وكىلدەرى مالىمدەگەندەي، بۇل پاندەميا باستالعالى بەرى العاشقى تولىق انشلاگ جيناعان كونسەرت بولدى. كونسەرتتە كورەرمەننىڭ اتاقتى وركەسترگە دەگەن ىستىق ىقىلاسى، بەتحوۆەن مۋزىكاسىنىڭ تانىمالدىعى مەن قازاقستاندىق مۋزىكانتتاردىڭ ونەرىنە دەگەن زور قىزىعۋشىلىق كەرەمەت ۇيلەسىم تاپتى.
«الەمدىك قاۋىمداستىق ەلىمىزدى قاڭتارداعى وقيعالاردىڭ سالدارىنان ساياسي كاتاكليزمدەر ارەناسى رەتىندە قابىلداعانى بەلگىلى. ءبىراق «FORTE TRIO» ءوز ونەرلەرى ارقىلى قازاقستاندى مادەنيەتى جوعارى دەڭگەيدە دامىعان، وزىندىك مۋزىكالىق داستۇرلەرى قالىپتاسقان مەملەكەت رەتىندە كورسەتە ءبىلدى. تريونىڭ ونەرىن جوعارى باعالاعان شەتەلدىكتەر ءبىزدىڭ ارتىستەردى كونسەرتتەن كەيىن ساحناعا تاعى 5 رەت شاقىردى»، - دەدى «قازاق كونسەرت» ديرەكتورىنىڭ ورىنباسارى لاۋرا احمەتوۆا.
وتكەن جىلدىڭ جەلتوقسان ايىندا «FORTE TRIO» فرانسيانىڭ 4 ءىرى قالاسىندا كونسەرت وتكىزىپ، وسى ەلدىڭ 2021 -جىلعى كونسەرتتىك ماۋسىمىن اياقتاعانى ءمالىم.
ەندى وتاندىق مۋزىكانتتار گەرمانيا ەلىنىڭ ونەرسۇيەر قاۋىمىن تامساندىرىپ، كوۆيدتىك شەكتەۋلەردەن شارشاعان تىڭدارماندارعا ۇمىتىلماس جارقىن ەموتسيا سىيلادى. قازاق كونسەرت قۇرامىندا ونەر كورسەتەتىن «FORTE TRIO» انسامبلى قازاقستاننىڭ ەڭبەك سىڭىرگەن قايراتكەرى تيمۋر ۋرمانچەيەۆتىڭ كوركەمدىك جەتەكشىلىگىمەن ونەر كورسەتەدى.
ۇجىمنىڭ ماقساتى - قازاقستاندىق كلاسسيكالىق مۋزىكانى الەمگە تانىتۋ. قازاقستاندىقتار «FORTE TRIO» ۇجىمىنىڭ ونەرىن 2-ناۋرىز كۇنى «استانا وپەرا» تەاترىندا «ليۋبيتە لي ۆى برامسا؟» اتتى جاڭا كونسەرتتە تاماشالاي الادى.
اۆتور: ءالي يبرايەۆ