ۇكىمەت باسشىسى اۋىل شارۋاشىلىعى ءونىمىنىڭ تيىمدىلىگىن كوتەرۋگە قاتىستى تاپسىرما بەردى

نۇر-سۇلتان. قازاقپارات - بۇگىن ۇكىمەت وتىرىسىندا اۋىل شارۋاشىلىعى سالاسىنداعى سۋبسيديانىڭ تيىمدىلىگىن ارتتىرۋ ماسەلەسى قارالدى، دەپ حابارلايدى قازاقپارات ءتىلشىسى.

پرەمەر-مينيستر ءاليحان سمايىلوۆ سۋبسيديا الۋشىلار ءۇشىن الداعى ۋاقىتتا قانداي قارسى مىندەتتەمەلەر قويىلاتىنىن جانە وسى مىندەتتەمەلەردىڭ ورىندالۋى دەڭگەيى قالاي باقىلاناتىنىن سۇرادى. ءوز كەزەگىندە قر اۋىل شارۋاشىلىعى ءمينيسترى ەربول قاراشوكەيەۆ قازىرگى كەزدە سۋبسيديا الۋشىلارعا بىردە- ءبىر قارسى مىندەمەلەلەر قويىلماعانىن ەسكە سالدى.

«سول سەبەپتى الىنعان سۋبسيديالاردى پايدالانۋ بارىسىندا جاۋاپكەرشىلىك وتە تومەن، سونداي- اق تيىمدىلىگى دە شەكتەلىپ وتىر. سوندىقتان ءتيىستى قارسى مىندەتتەمەلەردى ەنگىزۋدى جوسپارلاي كەلە، بارلىق سۋبسيديا الۋشىلار ءۇشىن ءوندىرىس كولەمىن تومەندەتپەۋ، مال شارۋاشىلىعىندا جىل سايىن مال باسىن كەمىندە 5 پايىزعا ۇلعايتۋ، 100 انالىققا شاققاندا كەمىندە 80 باس ءتول الۋ ەسكەرىلىپ وتىر. وسىمدىك شارۋاشىلىعىنا توقتالساق، تۇقىم شارۋاشىلىعى ەگىستىكتەرىنىڭ ۇلەس سالماعىن 15 پايىزدان كەم بولماۋ مىندەتتەمەسىن دە جوسپارلاپ وتىرمىز»، - دەدى مينيستر ونىڭ ايتۋىنشا، ينۆەستيتسيالىق سۋبسيديالاۋ كەزىندە فەرمەلەردىڭ جوبانى كورسەتىلگەن مەرزىمدە پايدالانۋعا بەرۋى نازارعا الىنادى.

«ودان باسقا، جوبالىق قۋاتىنا دەر كەزىندە قول جەتكىزىلۋىن كوزدەپ وتىرمىز. وسىنىڭ ءبارى ارنايى قۇرىلعان جۇمىس توبىندا تالقىلانىپ، ماقۇلدانعاننان كەيىن ەنگىزەتىن بولامىز. ەڭ ماڭىزدىسى، قويىلعان قارسى مىندەتتەمەلەردىڭ ورىندالۋىن باقىلاۋ پروتسەسى ادامنىڭ قاتىسۋىنسىز تسيفرلىق تەحنولوگيالار نەگىزىندە ەنگىزىلمەك. سۋبسيديالاۋدىڭ ءبىرىڭعاي مەملەكەتتىك اقپاراتتىق جۇيەسىندە اۆتوماتتاندىرىلعان تۇردە ەنگىزىلەدى»، - دەدى ەربول قاراشوكەيەۆ.

وسى ورايدا ۇكىمەت باسشىسى ءا. سمايىلوۆ باقىلاۋدى تسيفرلاندىرۋ ارقىلى جۇرگىزۋ كەرەك ەكەنىن قولدادى. «دەگەنمەن قارسى مىندەتتەمەلەردىڭ ءتىزىمىن تاعى دا ءبىر پىسىقتاپ شىعۋ كەرەك. قارسى مىندەتتەمەلەر اۋىل شارۋاشىلىعى ءونىمىنىڭ تيىمدىلىگىن كوتەرۋ كەرەك. وسى جۇمىستى ىنتالاندىرۋ ماڭىزدى. سوندىقتان بۇل ماسەلەنى جۇمىس توبىندا پىسىقتاپ، ءتيىستى ۇسىنىستاردى ەنگىزىڭىزدەر»، - دەدى پرەمەر- مينيستر.

بۇدان بۇرىن حابارلانعانداي، ە. قاراشوكەيەۆ سۋبسيديا الۋشىلار وزدەرىنە ناقتى ينديكاتيۆتىك كورسەتكىشتەرگە قول جەتكىزۋ بويىنشا قارسى مىندەتتەمەلەردى مىندەتتى تۇردە قابىلدايتىن نورما ەنگىزىلەتىنىن ايتتى.

اۆتور: رۋسلان عابباسوۆ