مينيستر حالىقتىڭ ءال-اۋقاتىن جاقسارتۋعا كەدەرگى فاكتورلاردى ايتتى

نۇر-سۇلتان. قازاقپارات - ۇلتتىق ەكونوميكا ءمينيسترى الىبەك قۋانتىروۆ قازاقستاندىقتاردىڭ ءال- اۋقاتىنىڭ جاقسارۋىنا كەدەرگى فاكتورلار تۋرالى ايتتى.

ونىڭ ايتۋىنشا، حالىقتىڭ تابىسىن ارتتىرۋ باعدارلاماسىن ازىرلەۋ جونىندەگى تاپسىرمانى ورىنداۋ اياسىندا ەڭبەك نارىعىنا، ءومىر ءسۇرۋ دەڭگەيى مەن كەدەيشىلىك كورسەتكىشتەرىنە، حالىقتىڭ كىرىستەرى مەن شىعىستارىنىڭ قۇرىلىمىنا تالداۋ جۇرگىزىلگەن.

«تالداۋ ناتيجەسى بويىنشا حالىقتىڭ ءال- اۋقاتىن جاقسارتۋعا كەدەرگى كەلتىرەتىن نەگىزگى سەبەپتەر انىقتالدى. بۇل ماسەلەلەردى جويۋ ماقساتىندا باعدارلاما ءتورت باعىت بويىنشا كەشەندى شارالاردى جۇزەگە اسىرۋعا باعىتتالادى:

ەڭبەك قىزمەتىنەن حالىقتىڭ تابىسىنىڭ ارتۋى؛

كاسىپكەرلىك قىزمەتتەن تۇسەتىن تابىستىڭ ارتۋى؛

جوعارى ءونىمدى جۇمىس ورىندارىن قۇرۋ؛

جۇمىس كۇشىنىڭ بىلىكتىلىگىن ارتتىرۋ»، - دەدى مينيستر ۇكىمەت وتىرىسىندا.

قۋانتىروۆ حالىقتىڭ تابىسىن ارتتىرۋ باعدارلاماسىن ازىرلەۋ اياسىندا ءتۇرلى دەلدالدار مەن مونوپوليست وپەراتورلاردىڭ كوميسسيالارى مەن تاريفتەرىن تولەۋ بويىنشا حالىقتىڭ قوسىمشا شىعىستارىن قىسقارتۋعا شارالار ازىرلەنىپ جاتقانىن ايتتى.

مينيستر ۇكىمەت كىرمە جولداردى ۇسىنۋ تاريفتەرىن تومەندەتۋ بويىنشا جەدەل شارالار قابىلداعانىن قوستى.

«كىرمە جولداردىڭ نەگىزگى بالانسۇستاۋشىسى سانالاتىن «كولىككە قىزمەت كورسەتۋ ورتالىعى« اق ءۇشىن تاريفتەر 92 پايىزعا تومەندەدى.

سونداي- اق، پاۆلودار وبلىسىنداعى كىرمە جولداردى قامتاماسىز ەتۋ بويىنشا قىزمەت كورسەتەتىن Arman Kala Limited ج ش س-نىڭ تاريفتەرى 93 پايىزعا تومەندەتىلدى. بۇل شارا «بوگاتىر كومىر« ج ش س وندىرەتىن كومىردىڭ وزىندىك قۇنىنا تۇسەتىن سالماقتى ازايتادى. سونىمەن قاتار، 2022 -جىلدىڭ 1-اقپانىنان باستاپ ەلىمىزدىڭ ءبىرقاتار وڭىرىندە كىرمە جول قىزمەتىن كورسەتەتىن 21 سۋبەكتىگە تاريفتەر ورتاشا ەسەپپەن 80 پايىزعا تومەندەتىلدى»، - دەدى ول.

ءمينيستردىڭ ايتۋىنشا، بۇل شارا كومىر قۇنىنا جانە الەۋمەتتىك ماڭىزى بار تاۋارلار باعاسىنا كەرى اسەردى جويادى.