ا ە س سالعانشا كۇن مەن جەل ەنەرگەتيكاسىن نەگە دامىتپاسقا - ءمينيستردىڭ جاۋابى
«ءبىرىنشى ماسەلە باعاعا بايلانىستى. جاڭارتىلاتىن ەنەرگيا كوزدەرىنىڭ قازىرگى تاريفى، ارينە، ءبىزدىڭ قولدانىستاعى ءداستۇرلى ستانسالارداعىدان قىمبات. ەكىنشىدەن، وكىنىشكە قاراي، جاڭارتىلاتىن ەنەرگيا كوزدەرى مانيەۆرگە يكەمسىز، ستانسالاردىڭ تىرەگىنە اينالا الادى دەۋگە دە كەلمەيدى. ياعني، ءۇزىلىسسىز قۋات بەرە المايدى. ويتكەنى تابيعاتتىڭ جاراتىلىسى سولاي - نە ۇنەمى جەل سوعىپ تۇرۋى كەرەك، نە ۇنەمى كۇن شىعىپ تۇرۋى شارت»، - دەدى مينيستر.
ونىڭ ايتۋىنشا جەل مەن كۇننەن الاتىن قۋاتتى دا گەنەراتسيالاۋعا بولادى.
«ول ءبىراق تازا گەنەراتسيا ەمەس، اككۋمۋلياتسيا عانا. جەل نەمەسە كۇن كوزى مول بولعان كەزدە ارتىعىمەن قۋات جيناقتاپ، قاۋىرت ساعاتتاردا تاپشىلىقتىڭ ورنىن جابۋعا بولادى. ءبىراق بۇل تەحنولوگيا ءالى جەتكىلىكتى دامىپ ۇلگەرگەن جوق. ونىڭ ۇستىنە قىمبات»، - دەدى بولات اقشولاقوۆ.
ۆەدومستۆو باسشىسى قازاقستاننىڭ جاعدايىندا اتوم ەلەكترىنىڭ ورنىن گاز دا باسا المايدى دەگەن پايىم ايتتى.
«قازاقستاننىڭ بۇل سالادا كومىرتەگى بەيتاراپتىعى تۋرالى ساياسات ۇستانىپ وتىرعانىن بىلەسىزدەر. كومىر جاعاتىن ۇلكەن ستانسالاردى جوبالاي المايمىز. مۇنداي تالاپپەن تەك گازدى جاعۋعا بولادى. قازاقستاننىڭ ەنەرگەتيكالىق تەڭگەرىمىنە 17 گۆت ەنەرگيا كەرەك دەسەك، ونىڭ ءبارىن گازبەن جابۋ ءۇشىن وراسان مول گاز كەرەك. قۋاتى 1 گۆت بولاتىن ستانسا جۇمىس ىستەۋى ءۇشىن شامامەن 2 ميلليارد تەكشە مەتر گاز قاجەت. 17 گۆت قۋاتتى گازدان الاتىن بولساق، بىزدە ونداي مولشەردەگى شيكىزات تا جوق. ونىڭ ۇستىنە ءبىز گازدى وڭىرلەردى گازداندىرۋعا جۇمساپ جاتىرمىز. گاز مۇنايمەن بىرىكتىرىپ، باسقا دا ونىمدەر الۋعا تاپتىرمايتىن شيكىزات. وسىنىڭ ءبارىن ەسكەرسەك، بىزدە اتوم ەنەرگەتيكاسىن دامىتۋدىڭ ۇلكەن الەۋەتى بار»، - دەدى ەنەرگەتيكا ءمينيسترى.
اۆتور: ەسىمجان ناقتىباي