بۇل تۋرالى ق ر باس پروكۋراتۋراسى ارنايى پروكۋرورلار قىزمەتىنىڭ باستىعى ريزابەك وجاروۆ ايتتى، دەپ حابارلايدى قازاقپارات ءتىلشىسى.
«الماتى قالاسىنىڭ، الماتى جانە قىزىلوردا وبلىستارىنىڭ ۇ ق ك دەپارتامەنتتەرىنىڭ لاۋازىمدى تۇلعالارى دا ارەكەتسىزدىك تانىتقان. كۇشتىك قۇرىلىمداردىڭ ءبىرقاتار باسشىلارى قۇقىقتىق ءتارتىپتى قامتاماسىز ەتۋگە ءتيىس ارنايى بولىمشەلەرىنىڭ ءىس-ارەكەتتەرىنە ادەيى توسقاۋىل قويۋى مۇمكىن ەكەندىگى جوققا شىعارىلمايدى. اتالعان فاكتىلەر بويىنشا ارنايى پروكۋرورلار سوتقا دەيىنگى تەرگەپ-تەكسەرۋ جۇرگىزۋدە»، - دەدى ريزابەك وجاروۆ ورتالىق كوممۋنيكاتسيالار قىزمەتىندەگى بريفينگ بارىسىندا.
سونىمەن قاتار ول ۇلتتىق قاۋىپسىزدىك كوميتەتى مەملەكەتكە وپاسىزدىق جاساۋ جانە بيلىكتى كۇشپەن باسىپ الۋعا ارەكەت ەتۋ بويىنشا قىلمىستىق ىستەردى تەرگەپ جاتقانىن ايتتى.
«بۇگىندە ۇ ق ك- ءنىڭ بۇرىنعى ءتوراعاسى مەن ونىڭ ەكى ورىنباسارى قاماۋعا الىندى. قىزمەت بابىن اسىرا پايدالاندى دەگەن كۇدىكپەن ۇ ق ك «ا» ارنايى ماقساتتاعى قىزمەتى ديرەكتورىنىڭ ءبىرىنشى ورىنباسارى جانە وسى قىزمەتتىڭ ورتالىق باسشىسى ۇستالدى. قىلمىستىق ءىس «اسا قۇپيا» ساناتىنا جاتقىزىلعان. سوندىقتان ۇلتتىق قاۋىپسىزدىك مۇددەسى ءۇشىن تەرگەۋ دەرەكتەرىن جاريا ەتۋگە بولمايدى»، - دەدى باس پروكۋراتۋرا وكىلى.