بۇل تۋرالى حالىقارالىق ادامزات باۋىرلاستىعى كۇنىندە وقىعان جولداۋىندا ب ۇ ۇ باس حاتشىسى انتونيۋ گۋتەرريش ايتتى، دەپ حابارلايدى قازاقپارات ب ۇ ۇ جاڭالىقتار سايتىنا سىلتەمە جاساپ.
حالىقارالىق باۋىرلاستىق كۇنىندە ول مادەني جانە ءدىني تۇسىنىستىك پەن ءوزارا قۇرمەتتىڭ ماڭىزدىلىعىن ەسكە سالىپ، ديالوگ پەن كونفەسسياارالىق كەلىسىمدى ىلگەرىلەتىپ وتىرعان دۇنيەجۇزىندەگى ءدىن كوشباسشىلارىنا العىسىن ءبىلدىردى.
ب ۇ ۇ باسشىسى ءوز جولداۋىندا تەك ءدىنى نەمەسە سەنىمى، ەتنيكالىق، جىنىسى نەمەسە جىنىستىق باعدارى نەگىزىندە ادامدارعا قارسى وشپەندىلىك، توزىمسىزدىك، كەمسىتۋشىلىك، ءتىپتى فيزيكالىق شابۋىلداردىڭ كوبەيۋىن ايىپتادى. گۋتەرريشتىڭ ايتۋىنشا، مۇنداي جانتۇرشىگەرلىك ارەكەتتەر - بىرىككەن ۇلتتار ۇيىمىنىڭ قۇندىلىقتارىنا جاسالعان شابۋىل. ول بارلىعى ءۇشىن ينكليۋزيۆتى، بەيبىت جانە ادىلەتتى الەم قۇرۋ ءۇشىن ىنتىماقتاستىقتا ارەكەت ەتۋگە شاقىردى.