ادۆوكات سۇڭقار نۇرماعانبەتوۆتىڭ ايتۋىنشا، اقجارقىن قازىر قىتايدا جازاسىن وتەپ جاتىر. ونىڭ ساۋدا جاساۋعا، تۇراقتى تۇردە وتباسىنا قوڭىراۋ شالىپ تۇرۋعا، سونىمەن قاتار حات الىپ، حاتقا جاۋاپ بەرۋگە مۇمكىندىگى بار ەكەنىن ايتتى.
زاڭگەر اقجارقىننىڭ اناسىنا جازعان حاتتارىنىڭ ءبىرىن جاريالادى.
بۇل تۋرالى Tengrinews.kz حابارلايدى.
«اياۋلى اناشىم. وتباسىممەن بىرگە بولۋدى قانشالىقتى ارماندايتىنىمدى بىلسەڭىز عوي. بالالىق شاعىمدى، سىزدەردى قاتتى ساعىندىم. بىلەسىز بە، ءبىزدىڭ جۇرەگىمىز ءبىر-بىرىمەن تىعىز بايلانىستى. ءبىز ءالى دە جاقىنبىز. مەن وتباسىمىزدىڭ ءاربىر مۇشەسىن ساعىندىم جانە جاقسى كورەمىن. سىزدەن تاعى دا حاتتار مەن فوتولار كۇتەمىن. سۇيىسپەنشىلىكپەن، قىزىڭىز اقجارقىن»، - دەلىنگەن وتكەن جىلدىڭ 15-جەلتوقسانىنداعى حات ماتىنىندە.
نۇرماعانبەتوۆ اقجارقىن ەلگە قاشان ورالادى دەگەن ساۋالعا دا جاۋاپ بەرۋگە تىرىستى.
«قازاقستاننىڭ سوتتالعان ازاماتتارىن بەرۋ 2015 -جىلى بەيجىڭدە قول قويىلعان ەكىجاقتى كەلىسىممەن رەتتەلەدى. مۇنداي كەلىسىم بارلىق ەلدە جوق. بۇل فاكت»، - دەيدى نۇرماعامبەتوۆ.
پروتسەدۋرا كەلەسى قادامداردان تۇرادى:
ءومىر بويى باس بوستاندىعىنان ايىرۋ جازاسىن باس بوستاندىعىنان ايىرۋعا قايتا قاراۋ تۋرالى شەشىم؛
ق ر باس پروكۋراتۋراسىنا سوتتالعان ازاماتتاردى قايتارۋ تۋرالى ءوتىنىشحات جولداۋ؛
ق ر باس پروكۋراتۋراسىنىڭ جانە سىرتقى ىستەر مينيسترلىگىنىڭ قىتاي تاراپىمەن سوتتالعان ازاماتتاردى قايتارۋدى جۇزەگە اسىرۋ بويىنشا ءوزارا ءىس- قيمىلى.
«وتە ماڭىزدى ءسات - جازا بيىل قايتا قارالۋى مۇمكىن. وسىعان كۇش سالۋدامىز. ەڭ الدىمەن بىزگە قولداۋ بىلدىرگەن قازاقستاندىقتارعا العىس ايتامىن»، - دەيدى نۇرماعامبەتوۆ.
ەسكە سالا كەتەيىك، قازاقستاندىق اقجارقىن تۇرلىباي 2014 -جىلى ناۋرىزدا گۋانجوۋ اۋەجايىندا ۇستالعان ەدى. كەيىن ونى ءومىر بويىنا باس بوستاندىعىنان ايىرعان بولاتىن. ءبىراز ۋاقىتتان كەيىن سوت ۇكىمى جويىلىپ، ءىس قايتا قاراۋعا جولداندى.
اقجارقىن تۇرلىباي سوت ۇكىمىن ءبىر جىلدان بەرى كۇتىپ وتىر. ماۋسىمدا قازاقستاندىق ديپلوماتتار قىتايدا سوتتالعان قازاقستاندىق اقجارقىن تۇرلىبايدىڭ كولونيادا يوگا مەن اعىلشىن ءتىلىن ۇيرەتىپ جۇرگەنىن حابارلادى.