ۇ و ك باس حاتشىسى يۋليا گالىشيەۆانىڭ نەلىكتەن جارىسقا شىقپاعانىن ءتۇسىندىردى
قر ۇلتتىق وليمپيادا كوميتەتى رەسمي حابارلاعانداي، يۋليا گالىشيەۆا وليمپيا ويىندارىنىڭ ىرىكتەۋ كەزەڭىن ەكىنشى اينالىمنان باستايدى. بۇل شەشىمدى باپكەرلەر كەڭەسى قابىلداعان.
«ىرىكتەۋدىڭ ءبىرىنشى كەزەڭىنە قاتىسپاي، بىردەن ەكىنشى اينالىمنان باستاۋ تۋرالى شەشىمدى باپكەرلەر قابىلدادى. بۇل شەشىم حالىقارالىق فەدەراتسيا رەگلامەنتىنە ساي كەلەدى ءارى ۇيىمداستىرۋ كوميتەتىمەن كەلىسىلدى. يۋليا بۇگىنگى باسەكەگە قاتىسۋعا دايىن ەدى، الايدا، پ ت ر تەستتىڭ تەرىس شىققانى تۋرالى اقپار جارىس باستالعاننان كەيىن بەلگىلى بولدى. بۇل ادەتتەگىدەي جاعداي ەمەس. بۇكىل بەيجىڭ وليمپياداسىنىڭ ۇيىمداستىرىلۋى دا ەرەكشە ەكەنى ايتىلىپ جاتىر. بارلىق قاتىسۋشىلار كۇن سايىن تاپسىراتىن پ ت ر تەستە قاراما-قايشىلىق كوپ جانە بۇل ماسەلەمەن تۇتاس دەلەگاتسيا دا بەتپە-بەت كەلىپ وتىر. ەڭ باستىسى - يۋليا ءوزىن جاقسى سەزىنۋدە جانە 6- اقپان كۇنگى باسەكەگە دايىن»، - دەدى ۇ و ك باس حاتشىسى اندرەي كريۋكوۆ.
فريستايل-موگۋلدان كوماندا باس باپكەرى ەلەنا كرۋگلىحينا جانكۇيەرلەرگە قولداۋ كورسەتكەنى ءۇشىن العىس ايتتى.
«بۇل وليمپيادا نە بولاتىنىن بولجاۋ وتە قيىن. مىنە، باستالعانى بۇگىن عانا، ال وسىعان دەيىن قانشاما جايتتار باستان وتۋدە. ءبىز ءۇشىن الاڭ بولماڭىزدار، سپورتشىلاردا ءبارى جاقسى. يۋليا ءوزىن جاقسى سەزىنۋدە، جۇمىستى ودان ءارى جالعاستىرامىز. بارشاڭىزدان قولداۋ كۇتەمىز، بىزگە جانكۇيەر بولىڭىزدار»، - دەدى باس باپكەر.
ەسكە سالا كەتەيىك، ايەلدەر اراسىنداعى ەكىنشى ىرىكتەۋ كەزەڭ 6- اقپاندا، ەرلەر اراسىنداعى دودا 5- اقپاندا وتەدى.
فينالدىق كەزەڭدەر دە وسى ۋاقىتقا جوسپارلانعان.
ەستەرىڭىزگە سالا كەتەيىك، وسىعان دەيىن فريستايل-موگۋلدان ايەلدەر اراسىنداعى العاشقى ىرىكتەۋ جارىسىندا وتانداستارىمىز ۇزدىك وندىققا كىرمەي قالسا، ەرلەر اسىندادا باق سىناعان دميتري رەيحەرد پەن پاۆەل كولماكوۆ تا ۇزدىكتەر قاتارىنان تىس قالعانىن جازعان بولاتىنبىز.
اۆتور: كۇنسۇلتان وتارباي