بۇل تۋرالى بەيسەنبى كۇنى رەسەيدىڭ دەنساۋلىق ساقتاۋ مينيسترلىگىنىڭ باسپا ءسوز قىزمەتى جۋرناليستەرگە ءمالىم ەتتى، دەپ حابارلايدى قازاقپارات تاسس اگەنتتىگىنە سىلتەمە جاساپ.
«سىناقتار اياقتالىپ، تىركەۋ كۋالىگى الىنعاننان كەيىن پرەپارات ازاماتتاردى قايتا ۆاكسينالاۋدا قولدانىلادى»، - دەلىنگەن حابارلامادا.
2021 -جىلدىڭ قازانىندا رەسەي فەدەراتسياسىنىڭ دەنساۋلىق ساقتاۋ مينيسترلىگى گامالەيا اتىنداعى ورتالىققا كوروناۆيرۋسقا قارسى مۇرىنعا تامىزاتىن ۆاكسينانىڭ كلينيكالىق زەرتتەۋلەرىنىڭ ەكىنشى فازاسىن وتكىزۋگە رۇقسات بەرگەن. بۇدان بۇرىن ورتالىق باسشىسى الەكساندر گينتسبۋرگ اتالعان ۆاكسينانىڭ كادىمگى ۆاكسينانى ەگۋدەن بوساتپايتىنىن، ونىڭ تەك ينفەكسيامەن كۇرەس جولىنداعى تاعى ءبىر قوسىمشاعا اينالاتىنىن ايتىپ وتكەن.
عالىمنىڭ سوزىنشە، مۇرىنعا تامىزاتىن ۆاكسينا جۇتقىنشاق پەن مۇرىن قۋىسىنىڭ قوسىلعان جەرىندە جەرگىلىكتى يممۋنيتەت قالىپتاستىرىپ، ۆيرۋستى اعزاعا كىرگىزبەۋگە كومەكتەسەتىن قوسىمشا شارا بولماق.
اۆتور: ءبيبىحان سەرىكوۆا