كەزدەسۋ بارىسىندا قالا اكىمى پوليتسيا قىزمەتكەرلەرىنە تەرروريستىك شابۋىلدار كەزىندەگى قىزمەتتەرى ءۇشىن العىسىن ءبىلدىردى.
«ءوز اتىمنان قاڭتار تراگەدياسى كەزىندە كاسىبي مىندەتتى ءمىنسىز اتقارعانىڭىز ءۇشىن العىس ايتام. مۇنداي قايعىلى جاعدايدى كەلەسىدە بولدىرماس ءۇشىن پوليتسيا قىزمەتىن جانداندىرىپ، زاماناۋي تەحنيكامەن جابدىقتاۋ كەرەك ەكەنىن قالاعا جاسالعان شابۋىل ايقىنداپ بەردى. قازا تاپقان پوليتسەيلەردىڭ وتباسىلارىنا كومەك كورسەتىلدى، قازىر بۇلىنگەن عيماراتتار جوندەلىپ، قايتا قالپىنا كەلتىرۋ جۇمىستارى ءجۇرىپ جاتىر. ءبىز ءبارىمىز قالانىڭ تىنىشتىعى ءۇشىن تىك تۇرىپ، ايانباي ەڭبەك ەتە الاتىنىمىزعا سەنىم بىلدىرگىم كەلەدى. ءبىز سىزدەرگە قالانىڭ ەڭ باستى بايلىعى - الماتى تۇرعىندارىنىڭ اماندىعى مەن دەنساۋلىعىن سەنىپ تاپسىرامىز»، - دەدى ەربولات دوسايەۆ.
سونداي-اق قالا اكىمىنە جەدەل باسقارۋ ورتالىعى، ونىڭ ىشىندە بۇكىل قالا بويىنشا ورناتىلعان 10 مىڭنان استام بەينەكامەراعا قوسىلعان بەينەباقىلاۋ جۇيەسى كورسەتىلدى.
اۆتور: دۋمان ارعىنگەلدى