اۋىر اتلەتيكادان ۇلتتىق قۇرامانىڭ باس باپكەرلەرى تاعايىندالدى
قازاقستان اۋىر اتلەتيكا فەدەراتسياسى ءمالىم ەتكەنىندەي، ەرلەردى نۇرجان سماحانوۆ، ايەلدەردى يۆان سيۆوحين باستاعان ماماندار جاتتىقتىراتىن بولدى.
بۇدان بۇرىن فەدەراتسيا ۇلتتىق وليمپيادا كوميتەتى، سونداي-اق مادەنيەت جانە سپورت مينيسترلىگىمەن كەلىسە وتىرىپ، قازاقستان ۇلتتىق قۇراماسىن ەكى كومانداعا - ەرلەر مەن ايەلدەرگە ءبولىپ باسقارۋ تۋرالى شەشىم قابىلداعان بولاتىن.
«نۇرجان داۋرەنبەك ۇلى مەن يۆان پاۆلوۆيچتىڭ ەكەۋى دە - جوعارى بىلىكتى ماماندار. قۇراما كوماندادا جۇمىس تاجىريبەسى بار. الداعى ۋاقىتتا دا ناتيجە شىعاراتىنىنا سەنەمىن. كوماندالار بيىلعى العاشقى وقۋ-جاتتىعۋ جيىنىنا كىرىستى. ەلدەگى ەپيدەميولوگيالىق احۋالدىڭ ناشارلاۋىنا بايلانىستى دەنساۋلىق جاعدايىمەن بارلىق سپورتشىلار تۇگەل قاتىسا المادى. دەگەنمەن 13- اقپاندا باستالاتىن ەكىنشى جيىنعا قوس كوماندا دا تولىق قۇرامدا كەلەدى دەپ ۇمىتتەنەمىز»، دەدى فەدەراتسيانىڭ باس حاتشىسى الديار نۇرالينوۆ.