بوپسالاۋشىنى ەلوردالىق پوليتسيا قاماۋعا الدى. ول بۇرىن سوتتالعان 25 جاستاعى ەلوردا تۇرعىنى بولىپ شىقتى. قىلمىسكەر ارەكەتىنىڭ سحەماسى قاراپايىم. ول كولىكتەردەن مەملەكەتتىك تىركەۋ بەلگىلەرىن الىپ تاستاپ، ونىڭ ورنىنا كولىكتىڭ الدىڭعى اينەگىنە ءنومىردى قالاي قايتارۋ كەرەكتىگى تۋرالى Telegram-ارناعا سىلتەمە بار جازبا قالدىرعان. سوسىن كولىك يەلەرىنەن حابارلاما كۇتكەن. كولىك يەلەرى بايلانىسقا شىققاننان كەيىن قاسكۇنەم اقشا اۋدارۋ ءۇشىن بانك كارتالارىنىڭ نومىرلەرىن نەمەسە ابونەنتتىك نومىرلەردى جىبەرگەن. قىزمەتى ءۇشىن 10 مىڭ تەڭگە سۇرادى. قازىرگى ۋاقىتتا ونىڭ ارەكەتىنەن 8 ادام زارداپ شەككەنى انىقتالدى. اتالعان فاكتى بويىنشا «بوپسالاۋ» بابى بويىنشا قىلمىستىق ءىس قوزعالىپ، ۇستالعان ازاماتتىڭ ەلوردا اۋماعىندا بۇرىن جاسالعان قىلمىستارعا قاتىستىلىعى تەكسەرىلۋدە. نۇر-سۇلتان قالاسىنىڭ پوليتسيا دەپارتامەنتى كۇزەتىلەتىن تۇراقتار، سونداي-اق بەينەباقىلاۋ كامەرالارىمەن جابدىقتالعان اۆتوتۇراقتار كولىكتەردى ۇرلاۋدىڭ الدىن الۋعا سەپتىگىن تيگىزەتىنىن ەسكەرتەدى.
اۆتور: سماعۇلوۆا ەركەجان