بۇل تۋرالى نۇر-سۇلتان قالاسىنىڭ سيفرلاندىرۋ جانە مەملەكەتتىك قىزمەت باسقارماسىنىڭ باسشىسى بوتاگوز قاسابەك ايتتى، دەپ حابارلايدى قازاقپارات ءتىلشىسى.
«وتكەن جىلى كۇش قۇرىلىمدارىنىڭ شۇعىل تاپسىرىسىنا سايكەس، قالا اۋماعىندا ءىرى ميتينگتەر وتەتىن قوعامدىق ورىندارعا 500 بەينەباقىلاۋ كامەراسى قويىلدى. قالا بويىنشا بەينەباقىلاۋ كامەراسىن ورناتۋ جۇمىسى ودان ءارى جالعاسادى. قازىر الماتى جانە بايقوڭىر اۋداندارى بويىنشا قاي جەرلەرگە كامەرا ورناتۋ كەرەكتىگى انىقتالدى. سارىارقا اۋدانىنا كەلسەك، بۇگىندە تەحنيكالىق تەكسەرۋ ءجۇرىپ جاتىر. سودان سوڭ ەسىل اۋدانىنا كىرىسەمىز»، - دەدى بوتاگوز قاسابەك قالالىق ءماسليحاتتىڭ وتىرىسىندا.
ونىڭ ايتۋىنشا، بەينەباقىلاۋ كامەرالارىن ورناتۋ جۇمىسى اۋداندىق اكىمدىكتەر جانە پوليتسيا دەپارتامەنتىمەن كەڭەسىپ جۇرگىزىلەدى.
«تاعى ءبىر وزگەرىس - بۇعان دەيىن قالا كارتاسىندا قاي جەردە بەينەباقىلاۋ كامەراسىنىڭ ورناتىلعانى كورسەتىلەتىن. ەندىگى ۋاقىتتا بەينەباقىلاۋ كامەراسى بار دەگەن بەلگىنى كارتادا كورسەتۋگە تىيىم سالىندى. بۇل لاڭكەستىككە قارسى ارەكەتتەردىڭ الدىن الۋ ماقساتىندا ەنگىزىلىپ وتىر»، - دەيدى ول.
بۇعان دەيىن باسقارما باسشىسى ەلوردادا «سەرگەك» كامەرالارىنىڭ ارتاتىنىن ايتقان ەدى. ودان بولەك، نۇر-سۇلتاندا سيفرلاندىرۋدىڭ جاڭا باعدارلاماسى ازىرلەنىپ جاتقانى بەلگىلى بولدى.