مينيسترلىكتىڭ باسپا ءسوز قىزمەتى ۇسىنعان مالىمەت بويىنشا، سىرتقى ساۋدا ساياساتى جانە حالىقارالىق ەكونوميكالىق ۇيىمدارعا قاتىسۋ ماسەلەلەرى جونىندەگى ۆەدومستۆوارالىق كوميسسيانىڭ وتىرىسىندا اتالمىش ۇسىنىس قولداۋ تاپقان.
«ازىق-تۇلىك تاۋارلارىنىڭ تۇتىنۋ نورمالارى بويىنشا حالىقتىڭ قاجەتتىلىگىن قامتاماسىز ەتۋ ءۇشىن 629,3 مىڭ توننا كارتوپ قاجەت. 2021-جىلعى كارتوپ ءوندىرىسىنىڭ كولەمى 4 ميلليون 034,7 مىڭ توننا بولعان. ءساۋىر ايىنا دەيىنگى كەزەڭ كارتوپ ساقتاۋعا قولايلى مەزگىل بولعاندىقتان 144,5 مىڭ توننا كارتوپتى كۆوتا بويىنشا ەكسپورتتاۋعا رۇقسات بەرىلىپ وتىر. بۇل اي سايىن 48,2 مىڭ توننا كاتورپتى سىرتقا ساتۋعا مۇمكىندىك بەرەدى»، - دەپ جازىلعان مينيسترلىكتىڭ مالىمەتىندە.
دەگەنمەن ۆەدومستۆو كارتوپتى ەكسپورتتاۋشىلارعا مىناداي تالاپتار قويۋ قاراستىرىلۋدا:
- كارتوپتى ارنايى ساقتاۋ وبەكتىلەرىندە ساقتالاتىن كارتوپتىڭ بولۋىن راستاۋ (كارتوپتىڭ جالپى كولەمىن جانە كوكونىس-كارتوپ قويماسىنىڭ مەكەنجايىن كورسەتە وتىرىپ)؛
- ەكسپورتتىق كولەمگە تەڭ كارتوپتى ىشكى نارىققا وتكىزۋ بويىنشا مىندەتتەمە قابىلداۋ؛
- كارتوپتىڭ ىشكى ساتۋ باعالارىن دەڭگەيدە بەكىتۋ.
«بۇل رەتتە، كارتوپ باعاسىنىڭ نەگىزىنەن ساتۋ كەزىندە وسەتىنىن اتاپ وتەمىز. ماسەلەن، اۋىلشارۋاشىلىق تاۋار وندىرۋشىلەر ورتاشا كوتەرمە ساۋدادا تونناسىنا 120 مىڭ تەڭگەمەن بەرەدى. ال بولشەك ساۋدا دۇكەندەرىندە كارتوپ باعاسى كەلىسىنە 200-220 تەڭگە بولىپ وتىر. وسىلايشا، ق ر باسەكەلەستىكتى قورعاۋ جانە دامىتۋ اگەنتتىگى مەن ق ر ساۋدا جانە ينتەگراتسيا مينيسترلىگى تاراپىنان باعا بەلگىلەۋ جانە ساۋدا ۇستەمەلەرىن قاتاڭ باقىلاۋدى قامتاماسىز ەتۋ تالاپ ەتىلەدى»، - دەلىنگەن ا ش م مالىمەتىندە.