بۇل تۋرالى ق ر دەنساۋلىق ساقتاۋ مينيسترلىگى سانيتارلىق- ەپيدەميولوگيالىق باقىلاۋ كوميتەتىنىڭ رەسمي وكىلى ەرجان بايتانايەۆ ءمالىم ەتتى، دەپ حابارلايدى قازاقپارات ءتىلشىسى.
«ءبىزدىڭ ەلدە بار ۆاكسينالار تولىق باقىلاۋدان وتكەن. ياعني قازاقستانعا اكەلىنەتىن ۆاكسينا الدىمەن شىعارىلعان ەلدە باقىلاۋدان ءوتىپ، رەسمي تىركەلەدى. بىزگە اكەلگەن سوڭ ونى ۇلتتىق ساراپتاما ورتالىعى تاعى تەكسەرەدى. سودان سوڭ بارىپ قانا تىركەيدى. ءبىزدىڭ ماماندار ۆاكسينانى باقىلاپ قانا قويماي، ونى زەرتتەيدى. وسى كۇنگە دەيىن ۆاكسينانىڭ سالدارىنان ادامنىڭ قايتىس بولۋ جاعدايى تىركەلگەن ەمەس»، - دەدى ەرجان بايتانايەۆ «حابار» تەلەارناسىنا بەرگەن سۇحباتى بارىسىندا.
ونىڭ ايتۋىنشا، قازاقستاندىقتار كوبىنەسە كوروناۆيرۋسقا قارسى سپۋتنيك V ۆاكسيناسىن الىپ جاتىر. سونداي-اق، كوميتەتتىڭ رەسمي وكىلى جاسوسپىرىمدەردىڭ ەكپە الۋىنا قاتىستى پىكىر ءبىلدىردى. «بىزدە جاسوسپىرىمدەرگە ارنالعان (12-17 جاس) Pfizer ۆاكسيناسى بار. بۇل ۆاكسينانى الەم مويىنداپ وتىر جانە ۇلكەن سۇرانىسقا يە. اتا-انالار بالالارىن ىندەتتەن قورعاۋ ماقساتىندا بۇل مۇمكىندىكتى پايدالانۋى كەرەك. وكىنىشكە قاراي، وزدەرى ۆاكسينا المايتىن جانە بالاسىنا دا الۋعا رۇقسات بەرمەيتىن اتا- انالار بار. ارينە، اتا-انانىڭ نەمەسە اسىراۋشىنىڭ رۇقساتىنسىز بالاعا ۆاكسينا سالىنبايدى. ءبىز ەشكىمدى ماجبۇرلەي المايمىز. مۇنداي جاعدايدا وتباسىنىڭ باسقا مۇشەلەرىنىڭ ەكپە العانى ءجون»، - دەيدى ول.
بۇعان دەيىن دەنساۋلىق ساقتاۋ مينيسرلىگىنىڭ وكىلى قازاقستاندىقتاردىڭ اراسىندا ءالى كۇنگە دەيىن كوروناۆيرۋستىڭ بارىنا سەنبەيتىن جانداردىڭ بارى تۋرالى ايتقان ەدى.
اۆتور: ءالي يبرايەۆ