الايدا رەسەي مۇنى جوققا شىعاردى. ناتو شىعىس ەۋروپاداعى اسكەري تەحنيكا سانىن ارتتىرا باستاعانى تۋرالى دا اقپارات شىقتى. شەكاراداعى شيەلەنىستەن كەيىن ۋكراينانىڭ ءتول اقشاسى قۇنسىزدانىپ كەتتى. ەكى ەل اراسىنداعى اقپاراتتىق سوعىس ۋكراينانىڭ باعالى قاعازدار نارىعىنا دا زور كەسىرىن تيگىزدى. وسىلايشا، جاڭا جىلدان بەرى رەسەي مەن ۋكراينا اراسىنداعى قاقتىعىس جاڭا قارقىنعا كوشتى.
الەۋمەتتىك جەلىدە رەسەيلىك اۋىر اسكەري تەحنيكا تيەلگەن پويىزداردىڭ بىرنەشە ۆيدەوسى تارادى. اسىرەسە، باتىستىڭ ب ا ق قۇرالدارى پويىزداردىڭ سىبىردەن ۋكراينامەن شەكارالاس اۋداندارىنا بارا جاتقانىن دۇرلىكتىرىپ جەتكىزدى. وسى ەكى ارادا ا ق ش پەن ۇلى بريتانيا ديپلوماتتارىنىڭ ءبىرقاتارىن ۋكراينادان ەۆاكۋاتسيالاۋدى ۇيعاردى. ال رۋمىنيا بيلىگى تىپتەن، رەسەي رەسمي كيەۆتى باسىپ العان جاعدايدا بوسقىنداردى قابىلداۋعا دايىن ەكەنىن مالىمدەپ ۇلگەردى.
وسىدان كەيىن گريۆنا بىردەن 4-5 پروتسەنتكە قۇنسىزدانىپ كەتتى. ۋكراينانىڭ باعالى قاعازدار نارىعىنان ينۆەستورلار بەلسەندى تۇردە كەتە باستاعانى دا بايقالدى. ءبىراق ەل پرەزيدەنتى زەلەنسكي ءوز مالىمدەمەسىندە رەسەيدەن ءتونىپ تۇرعان قاۋىپ جوق دەگەندى ايتتى.
ۆلاديمير زەلەنسكي، ۋكراينا پرەزيدەنتى:
- بەيبىت ءومىردى ورناتۋ ءۇشىن مۇمكىندىگىنشە ءتورت پرەزيدەنتتىڭ تەزىرەك كەزدەسىپ، ءبىر شەشىمگە كەلۋى ءۇشىن جۇمىس جاساپ جاتىرمىز. ارينە، بالالىق يلليۋزيا بىزدە جوق، ءبارى وڭاي ەمەس، ءبىراق سابىر مەن ۇمىتتەن قول ۇزگەن ەمەسپىز.
ەۋروپا ءوز ديپلوماتتارىن ۋكراينادان الدىرعان جوق. الايدا ءبىرقاتار ەل ەلشىلىك قىزمەتكەرلەرىن شاقىردى. الايدا بۇل جاعدايدىڭ ۋشىعۋىن بىلدىرمەيدى، مۇنى كۇردەلى ديپلوماتيالىق ويىننىڭ نازىك تۇستارى دەپ باعالايمىن. جەرگىلىكتى ب ا ق قۇرالدارى باتىس ەلدەرىندەگى ارىپتەستەردىڭ اسا قاتتى بەلسەندىلىك تانىتىپ وتىرعانىن ايتادى. ۋكراينا شەكاراسى ماڭىنداعى رەسەي ساربازدارىنىڭ سانىن دا ارتىعىمەن كورسەتىپ، «انە- مىنە سوعىس باستالادى» دەگەن ۇرەيلى اقپاراتتى تاراتقان. ساياسي ساراپشى، جۋرناليست پەتر بيلياننىڭ پىكىرىنشە، مۇنىڭ بارلىعى - «ساياسي ويىن».
پەتر بيليان، ساياسي ساراپشى:
- ءيا، رەسەي فەدەراتسياسى وقۋ- جاتتىعۋلارعا قاتىستى مانيەۆرلەر جاسادى، ءبىراق اسكەري جاتتىعۋلاردى ولار ءوز اۋماعىندا جۇرگىزدى. بۇل اسكەرلەر ۋكراينا شەكاراسىنان 200 شاقىرىمنان استام قاشىقتىقتا شوعىرلانعانىن اتاپ وتكەنىمىز ءجون. اسىرەسە، باتىستىڭ ب ا ق قۇرالدارى رەسەي اسكەرلەرىنىڭ سانى 150 مىڭعا جەتتى، انە- مىنە ۋكرايناعا باسىپ كىرەدى دەپ جازادى. بۇل شىندىققا ساي كەلمەيدى جانە مەملەكەتتى باسىپ الۋ ءۇشىن جوق دەگەندە ميلليون اسكەر كەرەك.
دەي تۇرعانمەن، ۋكراينانىڭ شىعىسىندا سەپاراتيستەرمەن سوعىس 8 جىل بويى توقتاعان جوق. ۇرىستى توقتاتۋ تۋرالى كوپ كەلىسىم جاسالعانىنا قاراماستان، دونباستاعى قاقتىعىس ءبىر كۇنگە دە توقتاعان ەمەس. ب ۇ ۇ- نىڭ دەرەگىنشە، 2014 -جىلدىڭ ساۋىرىنەن بەرى وسى ايماقتا 13 مىڭنان استام ادام قازا تاۋىپ، ءبىر ميلليونعا جۋىق حالىق ۇدەرە كوشۋگە ءماجبۇر بولدى.
www.24.kz