«سامۇرىق- قازىنا» باسشىسى قوردى رەفورمالاۋ بويىنشا قازاقستاندىقتاردان ۇسىنىس كۇتەتىنىن ايتتى
«بۇگىندە ەل باسشىلىعىنىڭ ساياسي ەرىك- جىگەرىنىڭ ارقاسىندا «سامۇرىق- قازىنادا» قوعامدا بەلسەندى تالقىلانىپ جاتقان رەفورمالاردى جۇرگىزۋ ءۇشىن بىرەگەي مۇمكىندىك پايدا بولدى. ءبىز رەفورمالاۋ باعدارلاماسى جوباسىنا ەنگىزۋ ءۇشىن سىندارلى ۇسىنىستارىمەن بولىسۋگە دايىن بارلىق اداممەن ديالوگ جۇرگىزەمىز. تاياۋ ۋاقىتتا بۇل جوسپارلار اشىق دەرەككوزدەرگە جانە ءبىزدىڭ كورپوراتيۆتىك سايتىمىزدا جاريالاناتىن بولادى. ءبىز سىزدەردىڭ بارلىق ساۋالدارىڭىزعا جاۋاپ بەرەمىز. بازالىق پرينتسيپتەر رەتىندە اشىقتىق پەن ەسەپتىلىك، بيزنەس ءۇشىن كەدەرگىلەردى جويۋ، الەۋمەتتىك جاۋاپكەرشىلىك جانە جەمقورلىقپەن كۇرەس ايقىندالعان. مەنىڭشە، ۇلتتىق بايلىقتى ءادىل ءبولۋ ەلەمەنتى رەتىندە قور اكتيۆتەرىن يەلىك ەتۋگە قازاقستان رەسپۋبليكاسى ازاماتتارىنىڭ تىكەلەي قاتىسۋ مۇمكىندىگى بەتبۇرىستى ءسات بولماق»، - دەپ جازدى قور باسشىسى Facebook-تە.
ونىڭ اتاپ وتۋىنشە، قوردىڭ كومپانيالار توبىندا ەل ەكونوميكاسىنىڭ باستى پروبلەمالارىن شەشۋ ماقساتىندا مۇناي، گاز، كومىر، تەمىر جول كولىگى، ەلەكتر ەنەرگياسى مەن تەلەكوممۋنيكاتسيا نارىقتارىنداعى ءوزارا قاتىناس قۇرىلىمىن وزگەرتۋگە، بيزنەس- پروتسەستەردى رەفورمالاۋعا جانە كورپوراتيۆتىك تاجىريبەگە باعىتتالعان ءبىرقاتار تەڭدەسسىز ءىس- شارا ۇسىنىلادى.
«ءبىز ساتىپ الۋلار جۇيەسىن تۇبەگەيلى قايتا قاراۋعا، وتاندىقتاۋار وندىرۋشىلەر مەن شاعىن جانە ورتا بيزنەستى قولداۋ تەتىكتەرىن كۇشەيتۋگە نيەتتىمىز. بۇل ماسەلەلەر سارسەنبى، 26-قاڭتار كۇنى بيزنەس قوعامداستىقپەن الەۋمەتتىك جەلىلەردە ونلاين- ترانسلياتسيا ارقىلى اشىق ديالوگ فورماتىندا تالقىلاناتىن بولادى. باعدارلامامىزدا بەكىتىلگەن جاعدايدا مەن ونى ءساتتى ەنگىزۋدى جانە ورىنداۋدى قامتاماسىز ەتۋگە دايىنمىن. سىزدەردەن ۇسىنىس كۇتەمىز. ونى ءبىزدىڭ usynys@sk.kz كورپوراتيۆتىك مەكەن جايىمىزعا جىبەرۋگە بولادى»، - دەدى الماسادام ساتقاليەۆ.
ەسكە سالايىق، 11- قاڭتار كۇنى ءماجىلىستىڭ جالپى وتىرىسىندا مەملەكەت باسشىسى قاسىم- جومارت توقايەۆ «سامۇرىق- قازىنا» قورىندا رەفورمالاۋ جۇرگىزۋ مۇلدەم مۇمكىن بولماسا، ونداي قۇرىلىمنىڭ ەكونوميكامىزدا بولماعانى ءجون ەكەندىگىن ايتقان بولاتىن.
«سامۇرىق- قازىنا» قورى قىزمەتىنىڭ تيىمدىلىگى ماسەلەسىنە توقتالعان پرەزيدەنت، بۇگىندە بۇل قوردىڭ اكتيۆى ەلىمىزدىڭ ىشكى جالپى ءونىمىنىڭ 60 پايىزىنا جۋىقتايتىنىن ايتتى. ياعني، وسى ۇيىمنىڭ ءتيىمدى قىزمەتى بۇكىل ەكونوميكامىزدى وركەندەتۋگە تىكەلەي اسەر ەتەدى. قوردىڭ كەگوك، قازاقگاز جانە قازاقستان تەمىر جولى سياقتى ينفراقۇرىلىمدىق كومپانيالارى ەكونوميكامىزدىڭ بارلىق دەرلىك سەكتورىنىڭ تيىمدىلىگىن ايقىندايدى. وسى تۇستا، قور ءوزىنىڭ نەگىزگى مىندەتىن ورىنداپ وتىر ما، ياعني ۇلتتىق بايلىقتى ەسەلەي الدى ما دەگەن ورىندى سۇراق تۋىندايدى. قوماقتى جالاقى الاتىن قىزمەتكەرلەرى، ديرەكتورلار كەڭەسى نەمەن اينالىسادى؟ قىزمەتى وتە قىمبات كونسالتينگ كومپانيالارىن جانە شەتەلدىك مامانداردى جۇمىسقا تارتقاننان پايدا بار ما؟ «، - دەگەن بولاتىن ق ر پرەزيدەنتى.
وسى رەتتە ق. توقايەۆ «سامۇرىق- قازىنا» قورى مەن باسقا دا ۇلتتىق كومپانيالاردىڭ ساتىپ الۋلارى ءتارتىبىن قايتا قاراستىرۋدى تاپسىردى. 20-قاڭتار كۇنى مەملەكەت باسشىسى قازاقستاننىڭ ءىرى بيزنەس وكىلدەرىمەن كەزدەسۋىندە «سامۇرىق- قازىنا» قورىنىڭ باسشىسىنا قوردى تۇبەگەيلى رەفورمالاۋ تۋرالى مىندەت جۇكتەلگەنىن، ەگەر ول مىندەتتى ەڭسەرە الماسا، جۇمىستان كەتەتىنىن ايتتى. ق ر پرەمەر- ءمينيسترى ءاليحان سمايىلوۆ «سامۇرىق- قازىنا» حولدينگىنىڭ شامامەن 40 كاسىپورنىن جەكەشەلەندىرۋ جوسپارلانىپ وتىرعانىن ءمالىم ەتتى.