«سىبايلاس جەمقورلىققا قارسى ساياساتقا قاتىستى بولەك رەفورما جۇزەگە اسىرىلاتىن بولادى. ءبىز جەمقورلىقتىڭ سەبەبىمەن ەمەس، سالدارىمەن كۇرەسۋىمىز كەرەك. پاراقورلىققا قاتىستى جۇيەلى تالداۋ جاساۋ قاجەت. شەنەۋنىكتەردىڭ بيزنەس پەن قاراپايىم ازاماتتاردىڭ شارۋاسىنا قانداي ءبىر اسەر ەتۋ ىقپالىن ازايتۋ كەرەك. بۇل شارۋاعا شىنايى تۇردە كىرىسكەن ءجون. اگەنتتىك سىبايلاس جەمقورلىقپەن كۇرەسۋدىڭ ستراتەگيالىق جوباسىن ازىرلەدى. ەندىگى ۋاقىتتا اتالعان جوبانى كاسىپكەرلەر قاۋىمداستىعىمەن تالقىلاعان ءجون. جانە وسى ورايدا كورپوراتيۆتىك جەمقورلىق ماسەلەسىنە دە ەرەكشە نازار اۋدارۋ قاجەت»، - دەدى قاسىم- جومارت توقايەۆ.
ودان بولەك، مەملەكەت باسشىسى ەلىمىزدىڭ تابيعي بايلىعىن قولدانۋعا قاتىستى اتاپ ءوتتى. «تابيعي بايلىقتى ءتيىمدى قولدانۋىمىز كەرەك. ۇكىمەت كەن ورىندارىنا رەۆيزيا جۇرگىزىپ، پايدالانىلماي جاتقان كەن ورىندارىن جانداندىرۋ ءۇشىن وتاندىق جانە شەتەلدىك ينۆەستيتسيانى تارتۋعا كۇش سالۋ قاجەت. ەگەر كەن ورنى بىرەۋدىڭ مەنشىگىندە بولىپ، ول قولدانىلماي جاتسا، ونى قايتارۋ كەرەك»، - دەيدى ول.
ەكونوميكانى دەوليگوليزاتسيالاۋ بويىنشا قاتاڭ ساياسات قاجەت.
«جاساندى قۇرىلعان جەكەمەنشىك مونوپولياعا ساراپتاما جۇرگىزۋ قاجەت. وپەراتورلار، اسىرەسە جەكەمەنشىك وپەراتورلار وتكەنگە كەتۋى ءتيىس. ەگەر ەستەرىڭىزدە بولسا، بۇرىنىراقتا «وتەپ الۋشى» دەگەن تەرمين بولعان. جەكە كومپانيا ءتيىستى تولەمگە مەملەكەتتىڭ ءبىرقاتار ەكونوميكالىق قىزمەتىن ءوزى ورىنداۋ ءۇشىن ساتىپ الدى. مۇنىڭ ەشقانداي دا جاقسىلىعى بولعان جوق»، - دەپ اتاپ ءوتتى مەملەكەت باسشىسى ەلىمىزدىڭ ءىرى بيزنەس وكىلدەرىمەن كەزدەسۋى بارىسىندا.
وسى رەتتە ق ر پرەزيدەنتى ۇكىمەتكە مۇنداي قىزمەتتەرگە زاڭنامامەن تىيىم سالۋدى قامتاماسىز ەتۋدى تاپسىردى.
«بارلىق تاۋاشا باسەكەلەستىك ءۇشىن اشىق بولۋى ءتيىس. مۇنداي بەيىندەگى ەرتەرەكتە قابىلدانعان بارلىق شەشىمدەرگە ساراپتاما جۇرگىزۋ جانەن ولاردى وزگەرتۋ بويىنشا شارا قابىلداۋ قاجەت. نارىقتا جاساندى جولمەن قۇرىلعان بارلىق كوپتەگەن دەلدالدىق تىزبەكتى جويۋ قاجەت. ەشكىم شەشكىسى كەلمەيتىن پروبلەما. ەكونوميكانى دەوليگوليزاتسيالاۋ بويىنشا قاتاڭ ساياسات قاجەت»، دەدى قاسىم- جومارت توقايەۆ.
اۆتور: ءالي يبرايەۆ