الماتى وبلىسىندا كومەندانتتىق ساعات ۋاقىتى وزگەردى

الماتى وبلىسى. قازاقپارات- الماتى وبلىسى پوليتسيا دەپارتامەنتىنىڭ باسشىسى سەرىك كۇدەبايەۆ حالىققا ۇندەۋ جاساپ، وڭىردەگى كومەندانتتىق ساعات ۋاقىتى وزگەرەتىنىن ءمالىم ەتتى، دەپ حابارلايدى قازاقپارات ءتىلشىسى.

«قازىر وبلىستاعى جاعداي تۇراقتى، سوعان بايلانىستى 12-قاڭتاردان باستاپ كومەندانتتىق ساعاتتىڭ ۋاقىتى وزگەردى. ياعني، ازاماتتاردىڭ جۇرۋىنە قويىلعان شەكتەۋ ساعات 20:00 دەن ەمەس، 23:00 دەن باستاپ تاڭعى 07:00 گە دەيىن بولادى. بارلىق تۇرعىنداردان جەكە كۋالىكتەرىن الىپ ءجۇرۋدى جانە ت ج تالاپتارىن قاتاڭ ساقتاۋلارىڭىزدى سۇرايمىن»، - دەدى سەرىك كۇدەبايەۆ.

ونىڭ ايتۋىنشا، جاپپاي تارتىپسىزدىك كەزىندە وڭىردەگى دۇكەندەر تونالىپ، اكىمشىلىك عيماراتتارى بۇلىنگەن. قۇقىقتىق ءتارتىپتى قامتاماسىز ەتۋ بويىنشا قىزمەتتىك بورىشىن اتقارىپ جۇرگەن پوليتسەيلەر مەن ۇلتتىق گۆارديانىڭ اسكەري قىزمەتكەرلەرى قازا تاپتى. جاعدايدى تۇراقتاندىرۋ ماقساتىندا بلوك- بەكەتتەر قويىلدى. وندا پوليتسيا مەن اسكەريلەر تاۋلىك بويى جۇمىس ىستەپ جاتىر. 35 اۆتوپاترۋل قالا تىنىشتىعىن تاۋلىگىنە ۇزدىكسىز باقىلاۋدا، وعان قوسا 20 جاساق ءپاترۋلى كۇندىز كۇزەتەدى. سونىمەن قاتار، ول تارتىپسىزدىك پەن دۇنيە- مۇلىكتى توناۋ قىلمىسىنا قاتىسى بار دەگەن كۇدىكپەن 700 دەن استام ادام ۇستالعانىن ايتتى. 65 قىلمىستىق ءىس قوزعالىپ، 62 ادام ۋاقىتشا ۇستاۋ يزولياتورىنا قامالدى.

ارنايى وپەراتسيا بارىسىندا قىلمىسكەرلەردەن 100 گە جۋىق اتىس قارۋى الىندى. سونداي- اق ول حالىققا ۇندەۋ جاساپ، بۇزاقىلىق پەن مارودەرلىك ىسكە قاتىسى بار ادامدار جايلى مالىمەت بار بولسا پوليسياعا حابارلاۋدى سۇرادى.