قىلقالام ۇشىنداعى قىرات

نۇر-سۇلتان.قازاقپارات -كوكالا دالا دوڭگەلەنىپ، كوكجيەكتەگى بۇيرات- بۇيرات توبەلەر قالقىپ تۇرعانداي كورىنەدى.

قايدا بارساڭىز دا سول قازاقتىڭ تاعدىرى جاستانعان توماعا توپىراق. توپىراق كۇبىرلەيدى، مۇڭ شاعادى. ارينە، ەستيتىن قۇلاق، كورەتىن كوز بولسا.. .

قۇيقالى مەكەننىڭ كۇزدەگى كورىنىسى كوڭىل تەربەيدى. جەلدىڭ داۋىسى جاڭعىرىپ تۇرعانداي. دالا ميمىرت ءارى شۋلى. قۋراعان قۋ تاقىر تىرلىكتىڭ ءبىر ساتتىك سىزباسى. باقساڭىز، بەلگىلى سۋرەتشى كاميل مۋللاشيەۆتىڭ «قىركۇيەكتەگى قۇلا دالا» كارتيناسى بىزگە تۋعان جەرىمىزدىڭ تاماشاسىن تارتۋ ەتىپ تۇرعانداي.

ءبىز وسىعان دەيىن جازعانبىز، جالپى كاميل مۋللاشيەۆتىڭ كارتينالارى ءماندى مەتافورالارعا، سيمۆولداردىڭ جۇيەسىنە، اۆتوردىڭ قيالى مەن ىشكى داۋىسىنا سۇيەنەدى. ولار ءوزىنىڭ بىرتۋمالىعىمەن، بەينەلىلىگىمەن جانە ايبىندىلىعىمەن تاڭعالدىرادى.

قىلقالام شەبەرىنىڭ شىعارماشىلىعى - قازاقستاننىڭ رۋحاني- مادەني ءومىرىنىڭ ءبىر بولىگى. ەل مەن جەردىڭ تاريحىنان، ومىرىنەن، شەجىرەسىنەن سىر تارتادى. سول ەسكى دە ەستى زاماندى كوركەم بەينەلەۋدىڭ شەبەرى. ونىڭ تۋىندىلارىنىڭ دەنى پەيزاج جانرىنا جاتادى.

«قىركۇيەكتەگى قۇلا دالا» كارتيناسىندا سۋرەتشى دالا تاقىرىبىن قوزعايدى. تۋىندى كەڭەستىك كەزەڭدە رەاليستىك مانەرمەن جازىلعان. ءبىر عاجابى - تۇمسا تابيعاتىمىزدىڭ الۋان تۇرلىلىگىن كورسەتەدى. ءبىزدىڭ الدىمىزدان قۇلا دالا، كوكجيەككە ۇمسىنعان الاسا تاۋلار شىعادى. قۇددى قول سوزىم جەردە تۇرعانداي كۇيگە بولەيدى.

كارتينا وقىرماندى سۇلۋ دا نازىك بوياۋلارىمەن، تۇستەردىڭ كوركەم اۋىسۋىمەن جانە رەڭكتىك قاتىناستاردىڭ ۇيلەسىمدى سىندارلىعىمەن وزىنە تارتادى.

تۋىندى جۇمساق جوسا، جاسىل- قوڭىر تۇستەرمەن جازىلعان. بوياۋلار سولعىن جانە قوڭىرقاي. سۋرەتشى كەڭىستىكتە كوسىلىپ جاتقان ەركىندىك پەن مولدىرلىكتى ەرەكشە جەتكىزە بىلگەن. دالا پەيزاجى قۇستاي ازات ءومىردىڭ ءلاززاتىن سەزىندىرەدى.

مۇحتار كۇمىسبەك

egemen.kz