مەملەكەت باسشىسى ۇجىمدىق قاۋىپسىزدىك تۋرالى شارتى ۇيىمىنىڭ كەزەكتەن تىس سامميتىنىڭ قورىتىندىسىنا كوڭىلى تولاتىنىن ايتىپ، ۇ ق ش ۇ بويىنشا وداقتاستارىنا تەرروريستىك اكتى كەزىندە قولداعانى جانە قازاقستانعا كورسەتكەن كومەگى ءۇشىن العىس ءبىلدىردى.
قازاقستان پرەزيدەنتى ۇ ق ش ۇ باس حاتشىسىنىڭ جەكە ءوزىنىڭ جانە حاتشىلىقتىڭ بارلىق قىزمەتكەرى مەن ۇ ق ش ۇ- نىڭ بىرىككەن شتابىنىڭ ەلىمىزدەگى بىتىمگەرلىك ميسسياسىن ۇيىمداستىرۋ جونىندەگى كۇش-جىگەرىنە قوسقان ۇلەسىن اتاپ ءوتتى.
- اتالعان جاعداي ۇيىمنىڭ اسكەري-ساياسي قۇرىلىم رەتىندەگى ماڭىزدى ەكەنىن تاعى ءبىر مارتە دالەلدەدى. قازىر ۇجىمدىق قاۋىپسىزدىك تۋرالى شارتى ۇيىمى تۋرالى حالىقارالىق قوعامداستىقتا اڭگىمە بولىپ جاتىر دەپ ويلايمىن. ۇيىمنىڭ تيىمدىلىگى قازىرگى جاعدايدا مەيلىنشە ايقىن كورىندى. سوندىقتان كەلەشەكتە ۇ ق ش ۇ ءوزىن پايدالى قۇرىلىم رەتىندە تانىتادى دەپ پايىمدايمىن. حاتشىلىق وزگە حالىقارالىق ۇيىمداردىڭ باسشىلىعىمەن اراداعى ىقپالداستىقتى جولعا قويۋى كەرەك دەپ ويلايمىن. بۇل وتە پايدالى بولادى. ۇ ق ش ۇ باس حاتشىسىنىڭ بىتىمگەرلىك وپەراتسيالار جونىندەگى ارناۋلى وكىلىنىڭ ينستيتۋتىن قۇرۋ دا وتە دۇرىس بولادى دەپ سانايمىن، - دەدى قاسىم-جومارت توقايەۆ.
ۇ ق ش ۇ باس حاتشىسى قازاقستاندا ۇ ق ش ۇ بىتىمگەرلىك ميسسياسىنىڭ ورىندالۋ بارىسى، ونىڭ ىشىندە قازاقستان پرەزيدەنتى بەلگىلەگەن مەرزىم ىشىندە ۇيىمعا مۇشە مەملەكەتتەر كونتينگەنتتەرىن ەلىمىزدەن شىعارۋعا دايىن ەكەنى تۋرالى اقپارات بەردى.
ستانيسلاۆ زاس تا قازاقستان پرەزيدەنتى ۇسىنعان ۇ ق ش ۇ باس حاتشىسىنىڭ بىتىمگەرلىك ماسەلەلەرى جونىندەگى ارناۋلى وكىلىنىڭ ينستيتۋتىن قۇرۋ جونىندەگى باستامانى جۇزەگە اسىرۋدىڭ ۋاقتىلى ءارى ماڭىزدى ەكەنىن قۇپتادى.
ەسكە سالا كەتسەك، بۇگىن الماتىدا جەدەل شتابتىڭ وتىرىسىن وتكىزگەن مەملەكەت باسشىسى ۇ ق ش ۇ بىرلەسكەن بىتىمگەرلىك كونتينگەنتىنىڭ بولىمشەلەرىن قايتارۋ جۇمىسى باستالاتىنىن ايتتى.