تاريح تاعىلىمىنا قاراساق، قونايەۆتاي ءىرى تۇلعالاردىڭ ۇلگىلى ءىسى مەن ارەكەتى حالىقتىڭ رۋحىن اسقاقتاتۋعا قىزمەت ەتەدى. ەلدىڭ ەلەۋلى ۇلدارى مەن قىزدارى كوپ حالىق تاريحتا ەلەۋسىز قالمايدى.
دىنمۇحامەد قونايەۆتاي مەملەكەت پەن قوعام قايراتكەرىنىڭ ءومىرى تاعىلىمعا تولى. سودان بولار، ول كىسىنىڭ ايتقان ءاربىر ءسوزى قازىرگى ۇرپاق ءۇشىن ءتالىم-تاربيە بەرەتىن ناقىلعا اينالعان. دانالىعى ءبىر توبە.
****
تاۋەلسىزدىكتىڭ جۇگى اۋىر.
****
تاريح بويامالاۋدى كوتەرمەيدى. بارى دا، شىنى دا وسى... ءار كەزدىڭ ءوز ءانى بار عوي. وعان ورىنداۋشى كىنالى بولماسا كەرەك.
****
ءسوز كيەسى - يەسىندە.
****
ساتىعا اياق سالماي جاتىپ، باسپالداقتان اتتاما.
****
ءورتتى سوندىرۋدەن گورى - ونى تۇتاتپاۋ ەرلىك.
****
ورىندى سىن ويلاندىرماي قويمايدى.
****
ءومىر - وزەن. اسىپ تا، تاسىپ تا جاتادى. ساباسىنا ءتۇسىپ، ءبىر قالىپپەن دە اعادى. ءبىراق وندا توقتاۋ جوق.
****
قياناتتان اسقان قىلمىس بولمايدى.
****
قاراڭ قالعان بيلىك قايتىپ وڭالمايدى.
****
قانمەن سىڭگەندى قاسيەتتەمەسەڭ، قادىرىڭ بولمايدى.
****
قازاق اۋىر ىستەن ەمەس، اۋىر سوزدەن قورقادى.
****
ەلدىڭ نالاسىن قارا باسىنىڭ ءبىر كۇندىك راحاتىنا ايىرباستاپ كەتۋدەن اسقان ساتقىندىق بولماس. ساقتانساڭ، وسىندايلاردان ساقتان، بولاشاق!
****
ءجىبى ءتۇزۋ، جانى تازا ادام كەز كەلگەن جاعدايدا، قانداي قىزمەتتى ىستەمەسىن قاشاندا ار-وجدانىن بيىك ۇستاپ قالادى.
****
جالپى، جار تاڭداۋ، ءۇي بولۋ - ەسى دۇرىس ادامعا ءبىر-اق رەت بەرىلەتىن باقىت. ول باقىتتى باياندى ەتۋ ءبىزدىڭ وزىمىزگە بايلانىستى. ومىرگە سەرگەك قاراۋ وسى وتباسىنان، ونىڭ ءتۇتىن تۇتەتەرى - سۇيگەن جارىڭدى سىيلاۋدان باستالادى.
****
جالادا شىندىق بولمايدى.
****
دۇنيە تۇسكە دەيىن كيىز، تۇستەن كەيىن ءمۇيىز بولۋى ءاپ-ساتتە.
****
ءبىتىمى قيسىق اعاشتىڭ كولەڭكەسى دە وزىندەي بولادى.
****
بيلىككە كوتەرىلدىم، ءبىراق حالىقتان الاسا ەكەنىمدى ۇمىتپادىم، قايتىپ اشار ەسىگىمدى قاتتى جاپپادىم. ءتۇپتىڭ تۇبىندە ورالار ورتام - ەل ءىشى، اعايىن ورتاسى. باسار جەرىم دە، بارار جەرىم دە - قارا جەر. قاستەرلەي بىلسەم قادىرىمنىڭ كەتپەسىن ءبىلدىم. پاناڭ دا ەل، داناڭ دا ەل. سوعان ارقا سۇيەدىم، سودان ۇيرەندىم.
****
اقيقاتتان اتتاپ كەتۋ - ارعا سىن.
****
ادامعا جازانىڭ ۇلكەنى - جۇمىسسىز قالدىرۋ.
****
ادام ايناسى - ادام.
massaget.kz