ول مۇقتاج تۇرعىنداردى جان- جاقتى قولداۋعا باعىتتالعان اۋقىمدى جوبا بولماق. اتالعان قور ەشبىر مەملەكەتتىك ورگانعا قارامايتىن، دەربەس، ناعىز حالىقتىق سيپاتتا بولادى. بىلىكتى باقىلاۋشىسى بار، جاۋاپتى باسشى تاعايىندالىپ، قىزمەتى مەن بيۋدجەتى بۇقاراعا اشىق جۇرگىزىلەدى.
«قازاقستان حالقىنا» قورىنا ەلىمىزدەگى ءىرى بيزنەس نىساندارى، اۋقىمدى كومپانيالار مەن اۋقاتتى تۇلعالار جۇيەلى تۇردە اۋدارىم جاساپ تۇرۋى ءتيىس. پرەزيدەنتتىڭ ايتۋىنشا، بۇگىن حالىق وزىنە تيەسىلى ۇلەستى الاتىن كەز جەتتى.
ەرلان ماديەۆ، الەمدىك ەكونوميكا جانە ساياسات ينستيتۋتىنىڭ ساراپشىسى:
- قازاقستان حالقىنا قورىنىڭ ماسەلەسى وتە ماڭىزدى ماسەلە. بۇل جەردەگى باستى مەسسەدج - قازاقستاننىڭ ءىرى ۇلتتىق كومپانيالارى، ءىرى بيزنەسى، سونىڭ ىشىندە بەلگىلى ءبىر ازاماتتار، ياعني وسى تاۋەلسىزدىك كەزىندە قوماقتى قارجى جيناعان ازاماتتار، ەندى وسى قارجىسىمەن قوعاممەن ءبولىسۋى كەرەك. ءوزىنىڭ الەۋمەتتىك فۋنكتسيالارىن ورىنداۋى قاجەت دەپ پرەزيدەنت ايتتى. سوندىقتان دا بۇل قوردىڭ قۇرىلىمى بولەك بولادى. ول وتە ۋنيكالدى قۇرىلىم بولادى. ول مەملەكەتكە تىكەلەي باعىنبايدى، دەربەس ورگان بولادى. ونىڭ باستى فۋنكسياسى، ارينە حالىقتىڭ الەۋمەتتىك جاعدايىن جاقسارتۋ.