ساراپشى الماسبەك سادىربايەۆ: پرەزيدەنتتىڭ ءسوزى مينيستر مەن اكىمدەر ءۇشىن دابىل بولۋى ءتيىس

نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ ماجىلىستەگى كەشەگى سوزىندە ەلدىڭ جاعدايىنا قاتىستى ءاربىر سالاعا جەكە-جەكە توقتالىپ، ناقتى تاپسىرمالار جۇكتەدى.

سونىڭ ىشىندە پرەزيدەنت اۋىل شارۋاشىلىعىنا دا ەرەكشە نازار اۋدارعان بولاتىن.

وسىعان وراي، قازاقپارات اۋىل شارۋاشىلىعى سالاسىندا كوپتەن بەرى وزەكتى ماسەلەنى كوتەرىپ جۇرگەن ساراپشى الماسبەك سادىربايەۆتىڭ پىكىرىن ۇسىنىپ وتىر.

«كەشە مەملەكەت باسشىسىنىڭ ۇندەۋىن بارشامىز تىڭدادىق. وندا ءبىراز دۇنيە ايتىلدى. ءبىرىنشى قۋانتارلىق جاعداي، ۋتيليزاتسيالىق الىم. پرەزيدەنت ۋتيليزاتسيالىق الىم توقتاتىلسىن دەدى. وتكەن اپتادا مەن اۋىل شارۋاشىلىعى مينيسترىمەن كەزدەستىم، كەزدەسۋدە مينيسترمەن اۋىل شارۋاشىلىعى سالاسى بويىنشا ۋتيليزاتسيالىق الىمدى الىپ تاستاۋ جونىندە دە اڭگىمە قوزعادىق. ەربول قاراشوكەيەۆ بۇل باستامانى قولدايتىنىن ءبىلدىردى. تۇسىنگەنىم، اۆتوكولىكتەر ءۇشىن ۋتيليزاتسيالىق الىمدى تومەندەتەدى، ال اۋىل شارۋاشىلىعى سالاسى، تەحنيكاسى ءۇشىن مۇلدەم الىپ تاستاۋ جاعى قارالىپ جاتىر. بۇل دەگەنىمىز اۋىل شارۋاشىلىعى تەحنيكاسى ارزاندايدى دەگەن ءسوز»، - دەدى الماسبەك سادىربايەۆ.

ونىڭ ايتۋىنشا، مەملەكەت باسشىسى ءوز ۇندەۋىندە اۋىل شارۋاشىلىعى سالاسىنا دا ەرەكشە ءمان بەردى.

«پرەزيدەنت ۇكىمەتتىڭ تۇقىممەن، جەم-شوپپەن، تىڭايتقىشپەن قامتاماسىز ەتۋمەن قاتار، ەگىن ەگۋ ناۋقانىن قاتاڭ باقىلاۋدا ۇستاۋ كەرەكتىگىن ايقىنداپ بەردى. ءيا، اۋىل شارۋاشىلىعى سالاسىنا قارجى ءبولىنىپ جاتىر. بىلتىر 72 ميلليارد تەڭگە قاراجات بولىنگەن، ءبىراق ونى كوبىنەسە ءىرى شارۋاشىلىق قوجالىق يەلەرى الىپ جاتىر. وسى ورايدا ۇساق شارۋاشىلىقتاردى دا نازاردان تىس قالدىرماسا. ونىڭ پايداسى نەدە ۇكىمەت كوكتەمدە 1 پايىزدىق مولشەرلەمەمەن قاراجات بەرەدى، ال شارۋا ونى كۇزدە ءونىم تۇرىندە قايتارىپ بەرەدى. شىنى كەرەك، اۋىلدى اعايىن ءبىز سونى سۇراماي، الماي ءجۇرمىز. ەندى سول مۇمكىندىكتى پايدالانايىق، بۇل جاقسى امال»، - دەيدى ول.

سونداي-اق، ساراپشى قۋاڭشىلىقپەن كۇرەستە ەل بولىپ بولىپ جۇمىلۋعا شاقىردى.

«مەملەكەت باسشىسى ۇندەۋىندە «سوڭعى جىلدارى ەلىمىزدە قۋاڭشىلىق بولدى، بولجام بويىنشا بيىل دا احۋال كۇردەلەنە ءتۇسۋى مۇمكىن»، دەدى. سالا ماماندارى دا ەلدەگى جاۋىن- شاشىن مەن قاردىڭ ءتۇسۋ مولشەرىن قاداعالاپ، وسى ويعا كەلىپ وتىر. پرەزيدەنتتىڭ بۇل ءسوزى سالا مينيسترلىگى مەن ءوڭىر اكىمدەرى ءۇشىن ناقتى دابىل. ماقسات - قۋاڭشىلىقتىڭ الدىن الۋىمىز قاجەت. جانە ونى ءبىر عانا مينيسترلىككە ارتىپ قويعان دۇرىس ەمەس، ءبارىمىز جۇمىلۋىمىز كەرەك»، - دەدى ا. سادىربايەۆ.

ودان بولەك، مامان اۋىل شارۋاشىلىعى ءۇشىن بەرىلەتىن سۋبسيديا ماسەلەسىنە توقتالىپ ءوتتى. «اۋىل شارۋاشىلىعىنا قاتىستى بۇرىننان كەلە جاتقان تاعى ءبىر پروبلەما. ءىرى قارا جانە ۇساق مالدى اسىلداندىرۋ، ۇرىقتاندىرۋ ماسەلەسى. قاسىم- جومارت توقايەۆ بۇعان دا توقتالىپ ءوتتى. ياعني مال تۇقىمىن اسىلداندىرۋعا بەرىلەتىن سۋبسيديا اشىق ءارى ءادىل تۇردە بەرىلۋى كەرەكتىگىنە ءجىتى ايتتى. ءبىز اشىقتىقتى قامتاماسىز ەتۋىمىز كەرەك. ول ءۇشىن ءبىز شارۋالارعا سۋبسيديانى الۋ ءادىس- تاسىلدەرىن ۇيرەتەمىز. سوندىقتان مالدى اسىلداندىرۋ مەن ۇرىقتاندىرۋعا بەرىلەتىن سۋبسيديانى الىپ تاستايدى دەگەن بەكەر ءسوز»، - دەدى ول.

ەسكە سالساق، كەشە مەملەكەت باسشىسى ءوز ۇندەۋىندە ۇكىمەتكە تۇقىممەن، جەم-شوپپەن، تىڭايتقىشپەن قامتاماسىز ەتۋ ماسەلەلەرىن جانە ەگىن ناۋقانىن قاتاڭ باقىلاۋدا ۇستاۋدى تاپسىرعان ەدى.

اۆتور: ءالي يبرايەۆ