قازاقپارات بۇل تۋرالى ق ر سىرتقى ىستەر مينيسترلىگىنىڭ مالىمەتىنە سىلتەمە جاساپ حابارلايدى.
بەينەكونفەرەنسيا فورماتىندا وتكەن وتىرىستىڭ كۇن تارتىبىندە قازاقستانداعى سوڭعى احۋال تالقىلانىپ، بىرلەسكەن مالىمدەمە جاسالدى. مالىمدەمەدە مينيسترلەر قاجەت بولعان جاعدايدا قازىرگى داعدارىستى ەڭسەرۋ ءۇشىن قازاقستان حالقى مەن ۇكىمەتىن قولداۋعا دايىن ەكەندىكتەرىن راستادى.
سونىمەن بىرگە، قازاقستان پرەزيدەنتى قاسىم- جومارت توقايەۆتىڭ قازاقستان حالقىنىڭ ءال- اۋقاتى مەن وركەندەۋىن ودان ءارى ارتتىرۋعا باعىتتالعان رەفورمالار باعدارلاماسىن جانە كونستيتۋتسيالىق ءتارتىپتى بۇزۋعا ۇمتىلعان تەرروريستەرگە، راديكالدارعا، ەكسترەميستەر مەن قىلمىسكەرلەرگە قارسى قازاقستان ۇكىمەتىنىڭ تەرروريزمگە قارسى وپەراتسيالارىن قولدايتىندارىن مالىمدەدى.
ايتا كەتەيىك، تۇركى مەملەكەتتەرى ۇيىمى قازاقستاننىڭ باستاماسىمەن 2009 -جىلى 3-قازاندا قۇرىلدى، حالىقارالىق ۇيىمنىڭ شتاب- پاتەرى ىستانبۇل قالاسىندا ورنالاسقان. ۇيىمعا قازاقستان، ازەربايجان، قىرعىزستان، تۇركيا، وزبەكستان مۇشە، ال ماجارستان مەن تۇرىكمەنستان باقىلاۋشى مارتەبەسىنە يە.