بۇگىن پارلامەنت ءماجىلىسىنىڭ جالپى وتىرىسىندا مەملەكەت باسشىسى قاسىم-جومارت توقايەۆ وسىلاي ءمالىم ەتتى، دەپ حابارلايدى قازاقپارات ءتىلشىسى.
«قيىن كۇندەر ارتتا قالدى. وسى ساتتە ەل تاعدىرى ءۇشىن ۇيىسا بىلگەن بۇكىل حالقىما شىنايى ريزاشىلىعىمدى بىلدىرەمىن. ءبارىمىز بۇل وقيعادان ساباق الۋىمىز كەرەك. ەڭ باستىسى، بەرەكە-بىرلىكتى، تىنىشتىق پەن تۇراقتىلىقتى ساقتاۋىمىز قاجەت. ەندى، قازاقستاندا دامۋدىڭ جاڭا كەزەڭى باستالادى. بۇل - شىنايى جاڭارۋ كەزەڭى بولادى. ەگەمەن ەلىمىزدى بىرگە وركەندەتەيىك. حالقىمىز ءۇشىن تاۋەلسىزدىك بارىنەن قىمبات! جاڭا قازاقستاندى بىرگە قۇرايىق!»، - دەدى مەملەكەت باسشىسى.
بۇدان بۇرىن حابارلانعانداي، قاسىم-جومارت توقايەۆ بيىل قىركۇيەك ايىنداعى جولداۋىندا ساياسي رەفورمالاردىڭ جاڭا پاكەتىن تانىستىرادى.
«قىركۇيەك ايىنداعى ءداستۇرلى جولداۋىمدا ساياسي رەفورمالاردىڭ جاڭا پاكەتىن تانىستىرامىن. ول ازاماتتىق قوعام جانە ساراپشىلارمەن كەڭەيتىلگەن ءارى كونسترۋكتيۆتى ديالوگ نەگىزىندە دايىندالادى. مەملەكەت ءوزىنىڭ بازالىق فۋنكتسيالارىنىڭ تولىققاندى جانە ساپالى ورىندالۋىن قامتاماسىز ەتۋى ءتيىس»، - دەدى مەملەكەت باسشىسى.