الماتىدان قاشىپ كەتپەك بولعان ءبىر توپ مارودەر ۇستالدى
16:23, 11 - قاڭتار 2022
الماتى. قازاقپارات - الماتىدان قاشپاق بولعان ءبىر توپ مارودەر ۇستالدى.
بۇل تۋرالى الماتى قالاسى كومەنداتۋراسىنىڭ اقپاراتتىق ورتالىعى ءمالىم ەتتى، دەپ حابارلايدى قازاقپارات ءتىلشىسى.
مەدەۋ اۋداندىق پوليتسيا قىزمەتكەرلەرى ماڭعىستاۋ وبلىسىنىڭ بەس تۇرعىنىن ۇستادى.
ولاردان ءتۇرلى ساۋدا ۇيلەرىنەن ۇرلانعان زاتتاي ايعاقتار تابىلدى. كۇدىكتىلەر بۇل زاتتاردى توناۋ جولىمەن العانىن مويىندادى. سونداي-اق، ۇستالعانداردان اسكەري قىزمەتشىلەرگە تيەسىلى شۋ گراناتالارى، باس كيىمدەرى، وق وتپەيتىن كيىم مەن قالقاندارى تاركىلەندى.
اتالعان فاكتى بويىنشا ق ر ق ك- ءنىڭ 272-بابى (جاپپاي تارتىپسىزدىكتەردى ۇيىمداستىرۋ جانە وعان قاتىسۋ) جانە ق ر ق ك- ءنىڭ 188-بابى (بوتەننىڭ مۇلكىن جاسىرىن جىمقىرۋ) بويىنشا سوتقا دەيىنگى تەرگەۋ باستالدى.
كۇدىكتىلەر ۋاقىتشا ۇستاۋ يزولياتورىنا قامالدى. قىلمىستىق ءىس سوتقا جىبەرىلەتىن بولادى.