بۇل تۋرالى «حابار 24» تەلەارناسىنىڭ ەفيرىندە ايتىلدى. توتەنشە جاعداي رەجيمى كەزىندە قۇقىق قورعاۋ ورگاندارى مەن كۇشتىك قۇرىلىمداردىڭ ايرىقشا وكىلەتتىكتەرى بولادى. زاڭ عىلىمدارىنىڭ دوكتورى مارات قوعاموۆتىڭ ايتۋىنشا، بۇل ءبىرقاتار زاڭنامالىق اكتىلەردە كوزدەلگەن.
«قازىر حالقىمىز تراگەديالىق احۋالدى باستان كەشىرىپ جاتىر. ءبارى بەرەكەلى اياقتالادى دەپ ۇمىتتەنەمىن. مەملەكەت باسشىسىنىڭ جاعدايدى تۇراقتاندىرۋ باعىتىنداعى شەشىمى كونستيتۋتسياعا نەگىزدەلىپ جاسالعاندىقتان، سولاي بولاتىنىنا سەنىمدىمىن. ەل اۋماعىندا توتەنشە جاعداي رەجيمى ەنگىزىلگەندىكتەن ءارقايسىمىز ءتيىستى قىزمەتتىڭ كيىمىن كيگەن وكىلدەردىڭ ايتقانىن ورىنداۋعا مىندەتتىمىز. كولىكپەن كەتىپ بارا جاتقاندا توقتاۋىمىزدى سۇراسا، ايالداۋىمىز كەرەك. وسى سياقتى ونىڭ زاڭدى تالاپتارىن تۇگەل ورىنداۋىمىز شارت. قاجەت ەتسە، جەكە كۋالىگىمزدى كورسەتىپ، جۇرگىزۋشى كۋالىگىن ۇسىنۋىمىز قاجەت. كولىكتەن شىعۋىمىزدى سۇراسا، ايتقانىن ورىنداپ، جۇكسالعىشتى، ارتقى جانە الدىڭعى ەسىكتەردى اشىپ، وندا قانداي زاتتىڭ نەمەسە كىمنىڭ بار ەكەنىن كورسەتۋ كەرەك»، - دەدى مارات قوعاموۆ.
زاڭگەر كۇشتىك قۇرىلىم وكىلدەرى قانداي جاعدايدا قارۋ پايدالانا الاتىنى تۋرالى دا زاڭدا ناقتى جازىلعانىن ايتادى.
«ەلىمىزدە تەرروريستىك قاۋىپتىڭ شەكتى «قىزىل» دەڭگەيى جاريالاندى. پوليتسيا وكىلدەرى مەن اسكەريلەر وقيعا ورنىندا احۋال مەن تاۋەكەلدى باعامداي الادى. ويتكەنى كومەندانتتىق ساعاتتىڭ وسىنداي ەرەكشەلىگى بار. قايتالاپ ايتامىن، قازىر ەرەكشە جاعدايدا تۇرمىز. ساعات 23.00-دەن 07.00-گە دەيىن كومەندانتتىق ساعات ەنگىزىلدى. ياعني بۇل ۋاقىتتا ەشكىم ۇيدەن شىقپاۋى كەرەك. كولىكپەن جۇرۋگە دە بولمايدى. ويتكەنى بۇل ۋاقىتتا ەلدى مەكەندەر تۇگەلىمەن ارميانىڭ بيلىگىندە بولادى. ازاماتتارعا تاۋەكەلگە بارماڭىزدار دەگىم كەلەدى. ەگەر كولىكپەن جۇرسەڭىز، الشاقتاۋعا تىرىسىڭىز. زاڭنىڭ تالابىنا قاراماستان ولار اتۋعا قۇقىلى. ولاردىڭ ارەكەتى دۇرىس بولىپ سانالادى. ويتكەنى كوممەندانتتىق ساعات كەزىندەگى كۇتپەگەن ارەكەتتىڭ ءبارىن ولار قىلمىستىق ارەكەت دەپ باعالاي الادى»، - دەپ كەڭەس بەردى زاڭگەر قازاقستاندىقتارعا.