«مەملەكەت باسشىسى قازاقستان حالقىنا ۇندەۋىن جاساپ، ەلىمىزدە قالىپتاسقان احۋالدى تۇراقتاندىرۋ ءۇشىن ءتيىستى شارالار جالعاسىپ جاتقانىن ايتتى. قازىرگى تاڭدا مەملەكەت بارلىق وڭىردەگى جاعدايدى تولىق باقىلاۋدا ۇستاپ وتىر. ەڭ باستىسى، ەلىمىز بويىنشا كونستيتۋتسيالىق زاڭدىلىق ورناتىلدى. بۇل - پرەزيدەنتىمىز ايتقانداي، ەنگىزىلگەن توتەنشە جاعدايدىڭ ناتيجەسى.
شىن مانىندە، ءبىز از كۇننىڭ ىشىندە تىنىشتىق پەن تۇراقتىلىقتىڭ كەز كەلگەن ۋاقىتتا قولدان سۋسىپ كەتۋى مۇمكىن ەكەنىن تۇسىندىك. داۋ كوبەيسە، جاۋ كوبەيەدى دەيدى. سوندىقتان قازىر ارانداتۋشىلار مەن الىپ-قاشپا اڭگىمەلەرگە ەرمەۋ اسا ماڭىزدى. سىن ساعاتتا پرەزيدەنتىمىزگە قولداۋ ءبىلدىرىپ، مەملەكەتتىلىكتى ساقتاۋ جولىندا جۇدىرىقتاي جۇمىلۋىمىز كەرەك»، - دەدى سەنات ءتوراعاسى.