«مەن قۇرعان ۆەدومستۆوارالىق توپ سودىرلار مەن لاڭكەستەردى ىزدەۋمەن جانە ولاردى ۇستاۋمەن اينالىسادى. ولاردىڭ ءبارى قاتاڭ قىلمىستىق جاۋاپكەرشىلىككە تارتىلادى دەپ ازاماتتارىمىزعا ۋادە بەرەمىن.
بارشا قازاقستاندىقتان وتىنەرىم، ساقتىق تانىتىپ، بارىنشا قىراعى بولىڭىزدار. كۇماندى ادامداردىڭ قانداي دا ءبىر كۇدىك تۋدىراتىن بەلسەندى ارەكەتىن بايقاساڭىز، قۇقىق قورعاۋ ورگاندارى مەن جەدەل جەلىلەرگە حابارلاڭىزدار.
قۇقىق قورعاۋ ورگاندارى مەن ارميانىڭ ءىس- قيمىلىنا، سونداي- اق ولاردىڭ ۆەدومستۆوارالىق ۇيلەسىمىنە قاتىستى انىقتايتىن ماسەلە كوپ.
ارناۋلى جاساقتىڭ، ارناۋلى قۇرال- جابدىقتاردىڭ جەتىسپەيتىنى بەلگىلى بولدى. وسى ماسەلەلەردى شۇعىل تۇردە شەشۋىمىز كەرەك»، - دەدى قاسىم- جومارت توقايەۆ ۇندەۋىندە.
مەملەكەت باسشىسىنىڭ ايتۋىنشا، ەلدەگى تارتىپسىزدىك كەزىندە جالعان اقپارات تاراتۋ جاعدايدى ۋشىقتىرا ءتۇستى.
«سودىرلاردىڭ تەرراكت جاساۋ تۋرالى جىمىسقى جوسپارى مەن جاسىرىن دايىندىعىن مەملەكەت قالايشا بىلمەي قالعانىن انىقتاپ، ءتۇسىنۋ اسا ماڭىزدى. تەك الماتىنىڭ وزىنە 20 مىڭ سودىر شابۋىل جاسادى.
بارلىق وبلىستا اسكەري، اكىمشىلىك جانە الەۋمەتتىك نىساندارعا ۇيىمداسقان تۇردە، جوعارى جاۋىنگەرلىك دايىندىقپەن جانە اسقان قاتىگەزدىكپەن شابۋىل جاساۋ ارەكەتى ولاردىڭ ناقتى جوسپارىنىڭ بولعانىن كورسەتتى.
سودىرلاردان بولەك، يدەولوگيالىق ديۆەرسيا جاساۋعا ابدەن جاتتىققان، جالعان اقپاراتتار مەن «فەيكتەر» تاراتۋدى شەبەر مەڭگەرگەن جانە ادامداردىڭ كوڭىل- كۇيىنە ىقپال ەتە الاتىن ماماندار جۇمىس ىستەگەن.
ولاردى دايىنداۋمەن جانە باسقارۋمەن ءبىرتۇتاس كوماندالىق پۋنكت اينالىسقانعا ۇقسايدى. بۇل ماسەلەمەن ۇ ق ك مەن باس پروكۋراتۋرا اينالىسىپ جاتىر»، - دەيدى ول.
اۆتور: ءالي يبرايەۆ