ەل وڭىرلەرىندەگى احۋال قالاي؟

نۇر- سۇلتان. قازاقپارات - ىشكى ىستەر مينيسترلىگى ەل اۋماعىندا زاڭدىلىقتى قالپىنا كەلتىرۋ، قىلمىسكەرلەردى، توناۋشىلاردى ۇستاۋ، باسىپ الىنعان عيماراتتاردى بوساتۋ، ستراتەگيالىق ماڭىزدى وبەكتىلەردى قورعاۋ جونىندەگى ءىس- شارالاردى جالعاستىرۋدا، دەپ حابارلايدى قازاقپارات.

قازاقستاننىڭ استاناسى نۇر- سۇلتاندا، شىمكەنت قالاسىندا جانە اقمولا، قىزىلوردا، پاۆلودار، سولتۇستىك قازاقستان جانە تۇركىستان وبلىستارىندا جاعداي تۇراقتى. ەڭ قيىن جاعداي الماتىدا قالىپ وتىر، وندا قارۋلى ادامدار مەملەكەتتىك ورگانداردىڭ، قارجى ۇيىمدارىنىڭ، تەلەكومپانيالاردىڭ، ساۋدا وبەكتىلەرىنىڭ ءبىرقاتار ءۇي- جايلارىن باسىپ الىپ، ءىشىنارا تالقاندادى. اقتوبە، اتىراۋ، باتىس قازاقستان، ماڭعىستاۋ وبلىستارىندا بىرنەشە اۆتوجول جانە 1 تەمىرجول ۋچاسكەسى جابىلدى. وڭىرلەردە پوليتسيا مەن ۇلتتىق ۇلاننىڭ جاساقتارى پاترۋلدەرى كۇشەيتىلدى، بلوك- بەكەتتەر قويىلدى، قۇقىق ءتارتىبىن بۇزۋشىلاردى ۇستاۋ، قىلمىسكەرلەردى انىقتاۋ جانە ۇستاۋ جۇرگىزىلۋدە، ال زاڭدى تالاپتارعا قارۋلى قارسىلىق بولعان جاعدايدا - ولاردى جويۋ قاراستىرىلعان.

قازىرگى ۋاقىتتا ىشكى ىستەر ورگاندارى 2298 ادامدى ۇستادى. قۇقىقتىق ءتارتىپتى قامتاماسىز ەتۋ، قىلمىستار مەن قۇقىق بۇزۋشىلىقتاردىڭ جولىن كەسۋ، ازاماتتاردىڭ قاۋىپسىزدىگىن قورعاۋ كەزىندە كۇشتىك قۇرىلىمداردىڭ 18 قىزمەتكەرى قازا تاپتى، ىشكى ىستەر ورگاندارىنىڭ 748 قىزمەتكەرى مەن ۇلتتىق ۇلاننىڭ اسكەري قىزمەتشىلەرى زارداپ شەكتى.